Сулҕаччы нэһилиэгин дьаһалтатын баһылыга Артем Степанов 2024 сыллааҕы ыытыллыбыт үлэтин нэһилиэнньэ иннигэр отчуоттаата. Мунньахха баһылыгы сэргэ сыллааҕы үлэлэрин нэһилиэк сүрүн тэрилтэлэрэ эмиэ билиһиннэрдилэр. Олохтоохтор ыытыллыбыт үлэни сэргииллэрин биллэрдилэр, тустаах боппуруостарын туруорустулар.
Отчуокка кэлбит дьон нэһилиэк ыыппыт үлэтин сэргэ, Х. Максимов аатынан култуура уонна сынньалаҥ киинин дириэктэрэ Жанна Максимова, И.И. Константинов — Дэлэгээт Уйбаан аатынан Сулҕаччы орто оскуолатын дириэктэрэ Иван Окороков, “Чычып-чаап” уһуйаан сэбиэдиссэйэ Алена Ефремова, нэһилиэк бэтэрээннэрин сэбиэтин бэрэссэдээтэлэ Елена Попова билиһиннэрдилэр. Отчуот Сулҕаччыны сэргэ Сэргэ-Бэс бөһүөлэгэр эмиэ буолла. Барыта 55 киһи сылдьан үлэни биһирииллэрин биллэрдилэр. Боппуруостар балайда киирдилэр. Ол курдук Амма-Чурапчы икки ардынааҕы өрөспүүбүлүкэ таһымнаах суолга тураҥнар тоҕо түһэннэр, суол аны саас, сайын алдьанар, быстар туруктаах, онно өрөмүөн үлэтэ ыытыллыа дуо, нэһилиэк генпланынан хайа диэки улаатыахтааҕый, дэриэбинэ ортотунан барар айан суола атын сиринэн барар гына туруорсуохха сөп дуо, “Первэй туран” уута тоҕо түһэр, онно бөҕөрҕөтүү үлэтэ барар дуо” диэн уонна да атын боппуруостар бэриллэн эппиэттэннилэр. Санаа атастаһыытыгар олохтоохтор Жанна Максимова, Алексей Никифоров, Николай Неустроев, Раиса Стручкова кытыннылар.
Нэһилиэк ортотугар баар тураҥнар тоҕо түһэн суолу алдьатан, сырыыга да, уһаайбаларга да кутталы үөскэтэрин, мелиорация үлэтэ олус наадалааҕын, арендаҕа биэрэн оттотор ходуһалаах дьон эмиэ ходуһа күрүө харабылыгар харчы төлүүллэрин туруорсуу, саҥа оскуола тутуллар буоллаҕына, турар сирин чопчу быһаарар, чинчийэр үлэлэри ыыта турар туһунан, тыа хаһаайыстыбатын исписэлииһэ нэһилиэнньэҕэ наадалаах бурдук, эбиэс уо.д.а. биллэриилэри группаларынан эрэ буолбакка, биирдиилээн, наадыйар дьоҥҥо биллэрэ олороро наадалааҕын ыйдылар. Онтон Сэргэ Бэс бөһүөлэгэр сүрүн ыйытыылар да, этиилэр да тыа хаһаайыстыбатын сайдыытыгар ыытыллар үлэлэргэ туһаайылыннылар. Ол курдук “Мигири” сайылыгар уот тардыллыыта, өрүс кытылын сааскы халаантан бөҕөргөтүү үлэлэлэрэ, “Маяк” ходуһатыгар маһа бэлэмнэнэн баран, тутулла илик бүтэй күрүө үлэтэ хаһан саҕаланарын, онно үп-харчы көрүлүннэ дуо диэн ыйытыылар киирдилэр. Сүрүн этиилэр тыа хаһаайыстыбатын үлэтинэн дьарыктаныыга ыччаты уһуйар, сайыҥҥы сынньалаҥ кэмигэр оскуола оҕолоругар үлэ уонна сынньалаҥ лааҕырдара үлэлииллэрэ наадалааҕын ыйдылар уонна ходуһа сирдэрин оҥорууга мелиорация үлэтэ ирдэниллэрин туруорустулар. Мунньахтар түмүктэригэр тыл эппиттэр нэһилиэк дьаһалтатын уонна баһылыгын сыл устата ыыппыт үлэтин биһирииллэрин биллэрдилэр
Елена ПОПОВА