Арассыыйа, Саха сирин суруйааччыларын сойууһун чилиэнэ, бэйиэт, биир дойдулаахпыт Зинаида Архипова “Көс Кут” диэн кинигэтин сүрэхтээн, айар киэһэтин ыытта. Истиҥ иһирэх киэһэҕэ айар куттаахтар, биир дойдулаахтара кыттыыны ылан иһирэхтик эҕэрдэлээтилэр. Бу киэһэ бэйиэт хоһооннорун иэйэн-куойан ааҕан истээччилэрин сөхтөрдө, долгутта, поэзия куйаарыгар көтүттэ.
Айар киэһэҕэ суруйар талааннаахтар, поэзияны сэҥээрээччилэр, ону сэргэ Зинаида доҕотторо, биир дойдулаахтара сырыттылар, санааларын тириэртилэр. Кинилэр ортолоругар норуот суруйааччылара Наталья Харлампьева, Елена Слепцова-Куорсуннаах бааллар. Маны сэргэ биир дойдулаахтара тиийэн эҕэрдэлэрин тириэрдэн, өссө да айар үлэтэ сайдан иһэригэр баҕа санааларын тириэртилэр. Тэрээһин Саха тыйаатырыгар Алампа саалатыгар олус сылаас, истиҥ эйгэҕэ ааста.
“Киэн туттар, таптыыр кыыспыт айар киэһэтэ үрдүк таһымҥа ааста. Зинаны саҥа айымньыта тахсыбытынан уонна оруобуна бу күн айыллан кэлбит күнэ сөп түбэсптинэн истиҥник эҕэрдэлиибит! Зина айар үлэтин таһынан өссө «Алта» кинигэ кыһатын салайан үлэлэтэн элбэх кинигэлэри оҥорон таһаарар. Бу күн киниэхэ махталлаах дьон кэлэн эҕэрдэлээбиттэриттэн киэн тутуннубут. Биһиги кинини кытта айымньылаахтык бииргэ үлэлэһэбит. Онон бу салаатыгар эмиэ айымньылаах үлэни баҕарабыт”, — диэн этэр Амма улууһун баһылыгын социальнай боппуруостарга солбуйааччы Ньургуйаана Илларионова.
Айар киэһэ бэйиэт саҥа тахсыбыт кинигэтиттэн бэйэтин хоһоонун аахпытын, ыллаабытын кэлбит дьон олус долгуйа истибиттэрэ. Айылҕаттан айдарыылаах, ис иһиттэн тахсан кутуллар хоһоон өссө эмиэ биир дойдулаахпыт, аммалар иннилэригэр уктар, талааныгар сүгүрүйэр кыыспыт, СӨ үтүөлээх артыыската Анна Томская үөрэнээччитин кытта доҕуһуоллаабыта олох сонуннук, уратытык иһиллибит.
“Мин ордук Зина Архипова хоһооннорун бэйэтэ аахпытын сөбүлээтим. Хоһоону кинигэттэн көрөн ааҕардааҕар, кини дорҕоон буолан тахсыбытын эт кулгааҕынан истэр быдан ылынымтыа буолар. Айымньыны суруйбут киһи бэйэтэ ис иһиттэн, иэйэн-куойан аахтаҕына хоһоон дьэ саҥа тыыннанар, иччилэнэр, араас өҥүнэн-дьүһүнэн байар дии саныыбын. Кини хоһоонун хайдах иэйэн-куойан төрөтөн таһаарбытын ааҕааччыга тириэрдэр. Этэргэ диэри хас биирдии хоһоонун дорҕоонун, рифматын, тэтимин барытын үчүгэй баҕайытык дьүөрэлээн, кинигэттэн көрөн буолбакка, бэйэтэ аахпыта наһаа ураты буолла, дьон кэрэхсибилин ылла. Аны кини сахалыы куттаах буолан, хоһоонун дорҕоонноро саха матыыбын дорҕоонугар бэркэ табыллан сыттылар. Ол курдук “Кыл саха” төрүт дорҕоон бөлөх салайааччыта Анна Томская кырыымпаҕа, онтон колледжка үөрэнэр оҕото хомуска оонньообута. Маны тэҥэ Зинаида кырыымпаҕа доҕуһуоллатан сахалыы матыыптаан ырыа ыллаабыта олох атыннык иһилиннэ. Ырыата хайдах эрэ түҥ былыргыттан эҥсиллэн кэлэр курдук. Уопсайынан мин көрөрбүнэн Зина олоҕу анааран көрөр, киэҥник хабар, киһини толкуйдатар хоһооннордоох. Онон да айар киэһэтэ үрдүк таһымнаахтык барда дии саныыбын. Кини билигин тыыллан-хабыллан тахсыбыт кэмигэр Амма сардаанатын эминньэхтэрин курдук бары талаана барыта арыллыбыт. Бу туһунан айар киэһэҕэ кэлбит дьон эмиэ бэлиэтээн эттилэр. Зина Архипова – ураты буочардаах, аныгы кэм бэйиэтэ эбит диэн санааҕа кэллим ”, — диэн “Тэтим” саха араадьыйатын шеф-редактора, СӨ култууратын үтүөлээх үлэһитэ Альбина Тарабукина санаатын үллэһиннэ.
Кэллиэгэбитин, СӨ Бэчээтин туйгунун Зинаида Архипованы биһиги эмиэ истиҥник эҕэрдэлээн туран, айар тэтимин аллаах ат курдук өссө тэтимирэн, бугуһуйан истин диэн алгыспытын аныыбыт. Эн талааҥҥар сүгүрүйээччилэр элбээтиннэр, саҥаттан саҥа үрдэлгэ тахсан ис!
“Амма олоҕо” хаһыат
Хаартыска: Юлия Пестрякова