“Утум”, “Урсун”, “Дом торговли” маҕаһыыннар ситимнэрин салайааччыта, Амма улууһун уонна Амма нэһилиэгин бочуоттаах олохтооҕо Людмила Куприянова Улуу Кыайыы бырааһынньыгар ытык бэтэрээннэргэ сылдьан эҕэрдэлиир үтүө үгэһэ өссө кини улуус дьокутаата эрдэҕиттэн саҕаламмыта. Быйыл эмиэ ытык дьонноругар сылдьан, кинилэри кытта көрсөн, бэйэтин кэлэктиибин аатыттан бэлэхтэрин туттарда.
“Мин ийэлээх аҕам Ольга Петровна Максимова уонна Еремей Максимович Федотов билигин бааллара буоллар, ытык 96 саастарыгар үктэниэ этилэр. Кинилэр иккиэн сэрии ыар сылларын билбиттэрэ, ол кэмҥэ тэҥҥэ тыылга Кыайыыны уһансыбыттара. Биһиги кэлэктиип сыл аайы бэтэрээннэргэ, сэрии сылын оҕолоругар сылдьан бу саамай долгутуулаах бырааһынньыгынан эҕэрдэлиир үгэспит олохсуйбута ыраатта. Онон бэтэрээннэрим күүтэллэр, тиийдэхпинэ оҕолуу олус үөрэн, астынан туран кэпсэтэн ааһабыт. Кинилэр сыл аайы аҕыйаан иһэллэр. Биһиги кинилэргэ ахсаабат кыһамньыбыт куруутун баар буолуохтаах.
Бэйэм дьоннорбун кытта тэҥҥэ үлэлээбит-хамсаабыт Лээгиттэн төрүттээх биир дойдулааҕым Мотрена Ивановна Алексеева 96 сааһыгар сырыттар, оҕо сааһын, сэрии аас-туор аччык кэмнэрин, онно эдэр саастарыгар хайдах үлэлээбиттэрин олус үчүгэйдик өйдүүр уонна кэпсиир. Кини төһө да сытар буоллар сэргэх, иккиэн Лээги туһунан кэпсэтэн аастыбыт. Бэтэрээннэрбит барахсаттар өссө да уһуннук олордуннар, чэгиэн буоллуннар, аттыбытыгар буолан үөрдэ, дьоллуу сырыттыннар. Кинилэр ытык сүбэлэрэ, сайаҕас санаалара олус күндү ”, — диэн этэр Людмила Еремеевна.
“Амма олоҕо” хаһыат