Кулун тутар 21 күнүгэр Хаҥалас сиригэр-уотугар өрөспүүбүлүкэтээҕи литература форума буолан ааста. Форумҥа айар куттаах дьону түмэр “Айар абылаҥ” түмсүү ситиһиилээхтик кытынна.
“Бэлиэ түгэн суругунан литературата төрүттэммитэ 125, Покровскай куорат оройуоннааҕы киин бибилэтиэкэ тэриллибитэ 90 үбүлүөйдээх сылын чэрчитинэн ыытылынна. Тэрийээччилэринэн киин бибилэтиэкэ, өрөспүүбүлүкэ суруйааччыларын сойууһа, өрөспүүбүлүкэтээҕи Александр Пушкин аатынан Национальнай бибилэтиэкэ, «Айар» кинигэ кыһата, Былатыан Ойуунускай аатынан литературнай түмэл, Максим Кирович Аммосов аатынан Хотугулуу-Илиҥҥи федеральнай университет буоллулар. Барыта 14 улуустан араас литературнай түмсүүлэр, холбоһуктар, кулууптар айар куттаах, суруйар талааннаах дьоно муһуннулар.
Норуот суруйааччылара Павел Харитонов — Ойуку, Наталья Михалёва — Сайа, норуокка киэҥник биллэр-көстөр дьоммут, Сарнылана Гольдерова — Саргы Куо, Ольга Корякина — Умсуура, Данил Макеев, Афанасий Гуринов — Арчылан, Уйбаан Шамаев, тылбаасчыт Альбина Борисова-Слепцова уонна да аттытар кэлэн кыттыыны ыллылар уонна «Проза», «Поэзия», «Оҕо литературата», «Литературнай тылбаас» секцияларынан үлэлээтилэр, сүбэ- ама биэрдилэр, ирэ-хоро кэпсэттилэр, бүгүҥҥү күҥҥэ суруйар эйгэ сүрүн кыһалҕаларын ырытыстылар, салгыы үлэлииргэ-хамсыырга резолюция ылыннылар. Биһиги Амматтан «Айар абылаҥ» түмсүүттэн Дария Васильева — Амма Даайыс, Наталия Рязанская, Анатолий Стручков, ДарияТомская буолан ситиһиилээхтик кытынныбыт.
Ол курдук «Лучшая творческая видеопрезентация» күрэххэ кыайыылаах аатын ылан, үөрүүбүт муҥура суох буолла. Улахан таһымнаах форумҥа кыттан, үгүс айар дьону кытта алтыһан, үөрүү-дьол сыдьаайдаах, салгыы айарга-тутарга күүспүтүгэр күүс эбинэн кынаттанан кэллибит”, – диэн түмсүү салайааччыта, Күннүк Уурастыырап аатынан кииннэммит бибилэтиэкэ кыраайы үөрэтэр салаатын сүрүн бибилэтиэкэрэ Вероника Стручкова сырдатта.
“Амма олоҕо” хаһыат