Болугур нэһилиэгэр 25 уонна 50 сыл бииргэ олорон кэлбит дьиэ кэргэттэри чиэстиир үгэс буолбут дьоро тэрээһин иһирэх эйгэҕэ буолан ааста. Дьиэ кэргэн сыаннастарын, таптал уонна бэриниилээх буолуу үтүө холобурун көрдөрбүт «Кыһыл көмүс» уонна «Үрүҥ көмүс» сыбаайбалаахтарбытын истиҥник эҕэрдэлээн «Мэлдьи бииргэ» диэн ыытыллар тэрээһин үбүлүөйдээх 20 сылын туолла.
Үйэ чиэппэрэ, үйэ аҥара бииргэ олорон, холобур буолар дьиэ кэргэттэрбитин 2006 сылтан бэлиэтиибит. Ол курдук бэлиэ, ураты тэрээһини 2006 сыллаахха Болугур нэһилиэгин дьахтар сэбиэтин салайааччыта Авдотия Потапова уонна Оксана Ефремова көҕүлээһиннэринэн саҕаламмыта. Оччотооҕу сыллартан, билиҥҥэ диэри Болугур нэһилиэгэ үбүлүөйдээх дьиэ кэргэттэри чиэстээн, кинилэргэ үгүс болҕомтону уурабыт. Бу сыллар тухары элбэх дьиэ кэргэн чиэстэнэн кэллилэр. Ол курдук 2025 – 2026 сылларга үбүлүөйдээх ыалларбыт бэлиэтэннилэр.
Кыһыл көмүс сыбаайбалаах дьиэ кэргэттэрбит: Галина Егоровна, Петр Прокопьевич Устиновтар, Любовь Семеновна, Константин Иванович Борисовтар, Матрена Николаевна, Николай Евсеевич Алексеевтар, Елизавета Ивановна, Семен Александрович Дьячковскайдар, Галина Алексеевна, Михаил Иванович Неустроевтар дьиэ кэргэттэрэ. Үрүҥ көмүс сыбаайбалаах дьиэ кэргэттэрбит: Тамара Егоровна, Дмитрий Николаевич Охлопковтар, Марианна Иннокентьевна, Егор Семенович Егоровтар, Надежда Валерьевна, Павел Павлович Пахомовтар, Туйаара Александровна, Прокопий Иванович Шестаковтар, Александра Николаевна, Сергей Лазаревич Михайловтар, Полина Владимировна, Михаил Алексеевич Неустроевтар, Евдокия Иннокентьевна, Николай Васильевич Гоголевтар, Сардаана Александровна, Гаврил Михайлович Кожуровтар, Анна Егоровна, Сергей Петрович Никифоров дьиэ кэргэттэрэ.
Бу үөрүүлээх, дьоро күн нэһилиэк баһылыга Андрей Петров истиҥ эҕэрдэтин уонна үбүлүөйдээх бэлэҕин үгэс буолбут «50 сыл бииргэ», «25 сыл бииргэ» анал бэлиэни дьиэ кэргэттэргэ туттарда. Истиҥ эҕэрдэтин “Болугур нэһилиэгэ” тыа түөлбэтин Гражданнар туруктарын аактатын суруйар исписэлиис Мария Кузьмина уонна дьиэ кэргэттэргэ Кыһыл көмүс уонна Үрүҥ көмүс альбомҥа илии баттатта. Бу үтүө тэрээһини бастакы тэрийбит күндү дьоммут Авдотия Васильевна уонна Оксана Константиновна эҕэрдэлэрин тиэрдэн, тэрээһини иилээн – саҕалаан илдьэ сылдьар М.А. Ноговицын аатынан култуура киинигэр бэйэлэрин сэмэй бэлэхтэрин туттардылар. Үөрүүлээх, дьоро тэрээһин аймах – билэ, атас – доҕор, түөлбэ дьоно, тэрилтэ үлэһиттэрэ эҕэрдэлээн олус истиҥник ааста.
Дьиэ кэргэттэри истиҥ ырыаларынан «Мичийээнэ» ансамбыл оҕолорун кытта, кэрэ үҥкүүнү «Талбаана» эдэр ийэлэр түмсүүлэрэ оҕолорун кытта, «Ийэ» туһунан истиҥ ырыаны Саина Павлова бэлэхтээтилэр. Күндү үбүлүөйдээх дьиэ кэргэттэрбит. Эһиги – биһиги кэскилбит, биһиги тирэхпит. Эһиги муударай сүбэҕит, үтүө холобургут биһиги нэһилиэкпитигэр олох үтүөтүн, дьиэ кэргэн күүһүн көрдөрөр. Эһиги олоххут – үйэлээх таптал уонна бэриниилээх буолуу сүдү кэскилэ.
Евдокия ПЛАТОНОВА