Болугур нэҺилиэгин хабыллар хаба ортотугар Мандар Уустан тирэхтэммит Туос ураҺа аҺыллар бэлиэ түгэнэ ыытылынна. Кэрэ тутуу олохтоох көҕүлээҺини өйүүр бырагыраама көмөтүнэн уонна норуот талааннаахтара айар-тутар баҕаларынан олоххо киирдэ. Сүрүн үлэ Ульяна Кузьмина дириэктэрдээх М.А. Ноговицын аатынан култуура киинин нөҥүө барда.
Болугурдар үөрүүлэрин улуус баҺылыгын э.т. Василий Бураев, баҺылыгы социальнай боппуруостарга солбуйааччы Николай Ларионов, Дьокуускайтан биир дойдулаахтара норуот бэйиэтэ Саргылана Гольдерова — Саргы Куо, Саха судаарыстыбаннай тыйаатырын тэрийэр салаатын салайааччыта Ньургуйаана Илларионова, Алтантан айылҕаттан айдарыылаах Матрена Григорьева — Чугдаара Хотун олоҕун аргыҺа Дмитрий Николаевичтыын, Амматтан, Тааттаттан айар талааннаахтар уонна да атын элбэх ыалдьыт кэлэн тэҥҥэ үллэҺиннилэр.
«УраҺабытын тутарга нэҺилиэк барыта үлэлээтэ, кыттыста диэххэ наада. Бу баҕабытын олоххо киллэрэр баҕалаах өрөспүүбүлүкэ оҥорор олохтоох көҕүлээҺиннэри өйүүр бырагырааматыгар кыттыбыппыт. Ол баҕа санаа өйөнүллэн өрөспүүбүлүкэттэн 2 мөл. солк субсидия ылбыппыт. Манна нэҺилиэнньэ уонна спонсордар кыттыҺан, көмөлөрүн уган уопсайа 2 мөл. 850 тыҺ солк киирбитэ. Ол гынан баран маны таҺынан нэҺилиэнньэ күүҺүнэн элбэх субуотунньуктар, атын элбэх үлэлэр ыытылыннылар. Онон бу ураҺабыт чахчы норуот күүҺүнэн тутулунна диэн этиэххэ сөп. Мин ис сүрэхтэн Туос ураҺабытын тутууга күүс-көмө буолбут бар дьоммутугар, уустарбытыгар, тутууну ыыппыт бэдэрээччит «Яков» тэрилтэ уолаттарыгар барҕа махталбын тириэрдэбин»,- диэн Болугур нэҺилиэгин баҺылыга Андрей Петров санаатын тириэртэ уонна Саха өрөспүүбүлүкэтин судаарыстыбаннаҺын күнүнэн истиҥ эҕэрдэлээтэ.
Дьэ, чахчы нэҺилиэк хабыллар хаба ортотугар, кэлбит киҺи быҺа ааспат, култуураларын киинин сэргэстэҺэ бэрт кэрэ көстүүлээх өбүгэлэрбит тутууларын кэрэҺэлиир туос ураҺа тутуллубута, бу аҥардас Болугур эрэ нэҺилиэгэр буолбакка, Амма улууҺугар, өрөспүүбүлүкэҕэ даҕаны биллэр-көстөр култуура эбийиэгэ буолла.
«Бу ураҺаҕа биэс сыл устата үлэлээтибит диэххэ наада. Барыта Таатта Баайагатыгар баран Мандар Ууска Моҕол ураһа тутуутугар кыттыҺыыттан саҕаламмыта. Онно Борис Федорович маннык туос ураҺалар хас улуус аайы баар буолуохтаахтар диэн санаатын эппитин ылынан, ону бэйэбит туойунан оҥорууга норуоппут маастара, өр сыл Амма улууҺун уустарын түмсүүтүн салайбыт Степан Прокопьевич Устинов «чэйиҥ ылсыаҕын» диэн үлэбитин саҕалаан барбыппыт. Тигиитэ үс сыл устата барда. Манна биҺиэхэ улахан тирэҕинэн бэйэбит биир дойдулаахпыт, Аммаҕа «Туос тойуга» диэн түмсүү салайааччыта, норуот маастара Клавдия Алексеевна Новикова буолла. Кини ыйыытынан-кэрдиитинэн улахан үлэ барда. НэҺилиэкпит «Арчылаана» эбэлэр түмсүүлэрэ олох бу сыллар усталарыгар илиилэрин араарбакка үлэлэстилэр. Сабын барытын сиэлтэн илииллэринэн хаттылар, Мандар Уус ойуутунан туостары киэргэттилэр. Кэрэхсэбиллээҕэ диэн туоспутун барытын бэйэбит сирбититтэн-уоппутуттан ылбыппыт. Туос ураҺабыт үрдүгэ быҺа холоон 9 миэтэрэ, ис бараана 7 миэтэрэ кэтиттээх. Манна 8 сэргэлээх, 7 нааралаах. Моҕол ураҺа курдук улахан буолбатах, ол иҺин көннөрү Туос ураҺа диэтибит. Онон дьэ биир улахан үлэбит түмүктэммитинэн туох баар бары кыттыспыт дьоммутугар улахан да улахан махталбытын тириэрдэбит»,- диэн М.А. Ноговицын аатынан култуура киинин уус уран салайааччыта Евдокия Платонова санаатын тириэртэ.
Бу күн кэлбит ыалдьыттарга култуура дириэктэрэ Ульяна Кузьмина «Кулун атах. Сырдыктааҕы кэм» бырайыактарын сырдатта, Туос ураҺа үлэтэ хайдах барбытын барытын көрдөрөн кэпсээтэ, култуура киинигэр олохтоох кыраайы үөрэтээччи Тимофей Никифоров «Сырдыктан саҕыллан сайдабыт», ону сэргэ «Кут уйгута» СӨ норуотун, уус уран маастардарын уонна уран тарбахтаахтарын быыстапкалара туран, кэлбит дьон болҕомтотун тартылар. Маны сэргэ СӨ уус уран оҥоҺуктарын маастара Ульяна Михайлова — Маай кыыҺа «Айылҕа амтаннаах чэйэ» диэн уоскулаҥ эйгэтин тэрийэн кэлбит дьон бэйэ отуттан оҥоҺуллубут сылаас чэйи астына амсайдылар.
СиҺилии өссө хаҺыакка сырдатыахпыт. Ааҕын, сурутуҥ.
«Амма олоҕо» хаҺыат