ССРС НА академига Л.В.Киренскэй төрөөбүтэ 115 сылыгар аналлаах Декада Амма лиссиэйигэр хаһааҥҥытааҕар да киэҥ хабааннаахтык уонна далааһыннаахтык ыытылынна.
Ол курдук Леонид Васильевич төрөөбүт күнүгэр, муус устар 7 күнүгэр, декада үөрүүлээх линейканан арылынна. Бу күн лиссиэй аактабай саалатыгар республика, Россия таһымыгар ыытыллар араас научнай-практическай кэмпириэнсийэлэргэ, олимпиадаларга, техническэй күрэхтэргэ үрдүк ситиһиилээх үөрэнээччилэри уонна кинилэр төрөппүттэрин, учууталларын чиэстээтилэр. Маны сэргэ, Киренскэй пааматынньыгар сибэкки дьөрбөтүн ууран, Дьокуускай уонна Красноярскай куораттары кытта тэҥинэн, күнүс 11 чааска академигы чиэстээтилэр. Бу суолталаах сиэргэ-туомҥа улууспут баһылыга Степан Кузьмин, баһылык солбуйааччыта Нюргуяна Илларионова, улуустааҕы депутаттар Сэбиэттэрин бэрэссэдээтэлэ Владимир Колосов, лиссиэй дириэктэрэ Дария Захарова о.д.а кытыннылар. Улахан дьону тэҥэ сибэкки дьөрбөтүн уурар чиэскэ Бүтүн Россиятааҕы «Инникигэ хардыы» кэмпириэнсийэ кыайыылаахтара, 11 кылаас үөрэнээччитэ Нарыйа Чаприна, 9 кылаас үөрэнээччитэ Влад Уваров тигистилэр.
Сарсыҥҥы күҥҥэ, муус устар 8 күнүгэр «Амгинский лицей — территория развития» диэн ааттаах учууталлар, үөрэнээччилэр уонна лиссиэй выпускниктарын научнай ыстатыйаларын түмэр, сборник сүрэхтэннэ. Бу бэлиэ түгэҥҥэ сборникка ыстатыйалара киирбит дьон хайдах аан маҥнай наукаҕа кэлбиттэрин, олохторугар туох суолталааҕын кэпсээтилэр.
Салгыы муус устар 9 күнүгэр «Через тернии к звездам» олус интэриэһинэй квиз-оонньуу 9-11 кылаас үөрэнээччилэригэр ыытылынна. Муус устар 10-гар космос куйаарыгар уһуллубут «Вызов» киинэни 5-11 кылаас үөрэнээччилэрэ бэркэ сэргээн көрдүлэр.
Муус устар 11 күнүгэр «Байконур» сабыылаах космодромугар, Москва куоракка «Космонавтика мемориальнай музейыгар», Калуга куоракка Константин Циалковскай космонавтика исориятын сырдатар государственнай музейыгар уонна Юрий Гагарин музей-заповеднигар 5-11 кылаас оҕолоро куйаар ситимин нөҥүө ыалдьыттаатылар.
Биир бэлиэ түгэнинэн начальнай оскуолаҕа Герой Паартатын арыйыы буолла. Бу Паарта лиссиэй үөрэнээччитигэр, анал байыаннай эпэрээссийэҕэ сырдык тыынын толук уурбут, хорсун сэрииһит, Российскай Аармыйа Сэбилэниилээх Күүстэрин майоругар Сысолятин Александр Юрьевичка ананна.
Манна эбии бу күн Герой-космонавт Сергей Николаевич Рязанскайы кытта интернет ситиминэн видеоквиз ыытыллынна.
Декада муус устар 12 күнүгэр алын кылаас үөрэнээччилэригэр «Навигаторы солнечной системы» диэн ааттаах сэргэх оонньуунан, 6-10 кылаастарга икки бөлөҕүнэн «Нужно ли осваивать космос, если есть проблемы на земле» диэн уоттаах-төлөннөөх, сытыы киирсиилээх дебатынан уонна үөрэнээччилэр, учууталлар төрөппүт комитетын кытта бэйэ илиинэн оҥорбут ракета макетын кыырай халлааҥҥа көтүтүүнэн түмүктэннэ.
Бу курдук академик Леонид Васильевич Киренскэй суолун тэлэн, лиссиэй үөрэнээччилэрэ, төрөппүттэрэ, учууталлара аныгы олоҕу кытта тэҥҥэ хардыылыыллар, космос куйаарыгар тиийэр дьоһун арыйыылары оҥорорго күнүн ахсын дьулуһаллар. Маннык тэтимнээх үгүс ситиһиилээх үлэ-хамнас үтүө түмүктэрдээх буолуо диэн эрэнэбит.
Наталия Рязанская.