Е.А.Шишигин аатынан Сатаҕай орто оскуолатыгар строевой хаамыы күрэҕэ буолла. Хаамыы бэйэбит биир дойдулаахпыт, кырыктаах кыргыс сэрии хонуутуттан бааһыран, тыыннаах ордон кэлбит хорсун-хоодуот саллаат, Крымскай кавалерийскай дивизия буойуна, “Хорсунун иһин” мэтээллээх, сэрии бэтэрээнэ Захаров Архип Михайлович төрөөбүтэ 110 сылыгар ананна.
Олунньу 23 күнэ Аҕа дойдуну көмүскээччилэр күннэрэ. Биһиги дойдубутугар бу ураты суолталаах бырааһынньык кэнчээри ыччакка күүстээх санааны, Ийэ дойдуга тапталы уонна бэриниилээх буолууну тускулуур. Бу чиэстээх күҥҥэ махтал тылбытын бэлиэтээн этэбит байыаннай дьайыы кыттыылаахтарыгар, Ийэ дойдубутун көмүскээбит уонна көмүскүү сылдьар дьоммутугар дириҥ ытыктабылбытын этэбит. Анаммыт күҥҥэ хорсун санаалаах, тулуурдаах, ыарахантан чаҕыйбат дуулаҕа дьулуурдаах дойду уонна дьиэ-кэргэн эрэллээх тирэхтэрэ буолар уол оҕолорго аналлаах элбэх тэрээһиннэр буолаллар. Бу күн биһиги умнубаппыт уоттаах сэриигэ саа-саадах тутан, Аҕа дойдуну чиэстээхтик көмүскээбит эһэлэрбит, хос эһэлэрбит албан ааттаах хорсун быһыыларын. Улуу Кыайыы туһугар сэриилэспит, сэрии уоттаах толоонугар көҥүл олох иһин олохторун толук уурбут байыастары дириҥ ытыктабылынан ахтабыт, кинилэр сырдык ааттарын кэриэстээн сүгүрүйэбит. Е.А.Шишигин аатынан Сатаҕай орто оскуолатыгар строевой хаамыы күрэҕэ буолла. Хаамыы бэйэбит биир дойдулаахпыт, кырыктаах кыргыс сэрии хонуутуттан бааһыран, тыыннаах ордон кэлбит хорсун-хоодуот саллаат, крымскай кавалерийскай дивизия буойуна, “Хорсунун иһин” мэтээллээх, сэрии бэтэрээнэ Захаров Архип Михайлович төрөөбүтэ 110 сылыгар ананна. Үөрүүлээх чааска ытык аҕа туһунан төрөппүт уола, “Үлэҕэ килбиэнин иһин” мэтээл кавалера, Саха сирин тыатын хаһаайыстыбатын үтүөлээх үлэһитэ, Сатаҕай нэһилиэгин бочуоттаах олохтооҕо Захаров Архип Архипович истиҥ-иһирэх ахтыыны оҥордо. Буойун Захаров Архип Михайловичка аналлаах элбэҕи кэпсиир быыстапка оҕо-аймах, дьон-сэргэ сэҥээриитин ылла.
Хаамыыны Советскай Армия кэккэтигэр Приморскай кыраай Дальневосточнай байыаннай уокуругар сулууспалаабыт, рядовой Архип Захаров, Российскай Армия бронетанковай войскатыгар сулууспалаабыт, сержант Ньургун Давыдов, Российскай Армия военно-космическай войскатыгар сулууспалаабыт, рядовой Михаил Никитин кэтээн көрдүлэр.
Кыайыылаахтар Архип Михайлович Захаров оҕолоро, сиэннэрэ туруорбут бириистэринэн наҕараадаланнылар. Муҥутуур кыайыылаахтар кубогынан бэлиэтэннилэр.
Тэрээһин иккис чааһыгар дойду иһинэн ыытыллар военно-патриотическай оонньуу “Зарница 2.0” бэрт сытыытык буолла. Бэлэмнээх хамаандалар кыайыы өрөгөйүн билэн үөрдүлэр.
Христина СКРЯБИНА