Абаҕа нэһилиэгэр Абаҕа пионердарыгар анаммыт мемориалга субуотунньук ыытыллынна. Мемориал тыа сирин кэлимник сайыннарыы судаарыстыбаннай бырагырааманан саҥардыллар.
“Биһиги нэһилиэкпит Саха сирин гражданскай сэриитэ саамай үгэннээн барбыт сирэ буолар. Ол курдук 1927 сыллаахха сэтинньи 8 күнүн түүнүгэр сарсыарда сэтинньи 9 күнэ үүнэригэр бастакы пионердар Ийэ дойдуларын иннигэр бэриниилээх буоларга диэн биэрбит андаҕардарын толору толорбуттара, үрүҥ баандалары утары харса суох сэриигэ турунан, саҥа олохтоммут сэбиэскэй былааһы көмүскээбиттэрэ. Бу буолбут кыргыһыы, Абаҕа герой пионердарын хорсун быһыыларын үйэтитиигэ кинилэргэ анаммыт пааматыннык туталларын өйүүргэ ыҥырыы “Бэлэм буол” хаһыакка 1977 сыллаахха бэс ыйын 17 күнүгэр бэчээттэммитэ. Пааматынньык Абаҕа нэһилиэгэр ити сыл ахсынньы 9 күнүгэр арыллыбыта. Бу сыл Абаҕа пионердарын сэриитэ 50 сылын туолбута. Пааматынньык тэлээрбит пионерскай хаалтыс курдук, бырайыак ааптардара скульптор Петр Захаров уонна архитектор Василий Корнилов этилэр. Мемориалга кыргыһыы бары кыттыылаахтарын аата суруллубут пирамидалар турбуттара. Кэлэр 2027 сылга Абаҕа пионердарын сэриитэ үбүлүөйдээх 100 сылын туолуохтаах. Бэлиэ датаҕа бэлэмнэнии тэрээһинин чэрчитинэн, былырыын «Комплексное развитие сельских территорий» диэн судаарыстыбаннай бырагыраама иһинэн «Благоустройство сельских территорий» күрэххэ мемориалы саҥардыы бырайыагынан кыттыбыппыт. Үөрүөхпүт иһин күрэх түмүгүнэн бырайыакпыт кыайыылаах тахсан, быйылгы сылга саҥардыы үлэтэ ыытыллынна. Бу күрэх биир сүрүн ирдэбилинэн олохтоох дьон бэйэтин кылаатын киллэриэхтээх диэн. Ол ирдэбили тутуһан нэһилиэнньэ кыттыылаах субуотунньук тэриллэр.
Нэһилиэкпитигэр биир тупсаҕай көстүүлээх буолар сирбитигэр, Абаҕа пионердарын мемориалыгар ыытыллыбыт субуотунньукка көхтөөх кыттыыны ылбыт дьоммутугар олохтоох дьаһалта аатыттан махталбытын тириэрдэбит. Кэлэр нэдиэлэҕэ өссө көҕөрдүү үлэтэ (мас олордуута) ыытыллыаҕа, өйдөбүнньүк стенда туруоҕа. Бу курдук олохтоох көҕүлээһини өйүүр, тыа сирин территорияларын биир кэлим сайыннарыыга туһуламмыт бырагыраамалар бааллара олус үчүгэй. Бу бырагыраамалар көмөлөрүнэн нэһилиэктэргэ элбэх үлэ ыытыллынна. Ол курдук холобура Абаҕа нэһилиэгэр быйылгы сылга ППМИ -нэн оҕо оонньуур былаһаакката саҥардыллынна. Онон инникитин бырагыраамалар үлэлээн тыа сирин нэһилиэктэрэ тупсаҕай көстүүлээх буолалларыгар төһүү буола турдуннар”, — диэн Абаҕа нэһилиэгин баһылыгын солбуйааччы Степанида Гоголева санаатын үллэстэр.
“Амма олоҕо” хаһыат