Абаҕа нэһилиэгэр аҕыйах ахсааннаах 6 нүөмэрдээх баһаарынай чаас тэриллибитэ 15 сыллаах үбүлүөйүн бэлиэтээн, уруккуну санаан, билиҥҥини кэпсэтэн бэрт иһирэх көрсүһүү буолан ааста. Нэһилиэккэ биир суолталаах, баһаар тахсар түгэнигэр көмөлтө буолар тэрилтэ бэлиэ түгэнигэр ыраахтан-чугастан ыалдьыттар кэлэн эҕэрдэлэрин тириэртилэр, наҕараадалары туттардылар.
Баһаарынай чаас бэйэтин дьоҕус үбүлүөйүнэн хайдах тэриллибиттэрин, кимнээх үлэлээн ааспыттарын кэпсиир буклет оҥорон кэлбит ыалдьыттарыгар бэлэхтээтэ. Онтон билистэххэ, 2008 сыллаахха уопсастыбанньык Павел Павлович Дьячковскай Абаҕа нэһилиэгин оччотооҕу баһылыга Михаил Анатольевич Ефремовтыын хайдах гынан баһаарынай чааһы аһан үлэлэтиэххэ сөбүн туһунан элбэхтэ кэпсэтэн, сүбэлэһэн баран, бэйэлэрин күүстэринэн тутарга уонна массыынатын, үлэһиттэр штаттарын СӨ Ыксаллаах быһыыга-майгыга кылаабынай Управлениятыттан көрдөһөргө быһаарыммыттар. Бу чаас нэһилиэк социальнай эбийиэктэрин уонна олохтоохтор баайдарын-дуолларын баһаартан харыстыахтаах, оччотугар баһаартан эмсэҕэлиир хомолтолоох түгэннэр тахсыа суохтаахтар. Кинилэр этиилэрин ол кэмҥэ улуус баһылыга Артемьев Александр Еремеевич өйөөн Михаил Анатольевичтыын СӨ ЫБМ кылаабынай управлениятын салайааччытыгар, генерал-майор Александр Горкуҥҥа киирэ сылдьан былааннарын кэпсээн өйөбүл ылбыттар. Үлэ саҕаламмытын кэннэ Управление салайааччыта 9 штатнай единицаны, 1 анал массыынаны биэриэхпит диэн эрэннэрбит. Дьэ онтон 2009 сылтан саҕалаан холхуос быраҕыллан турар 4 кыбартыыралаах дьиэтин акылаатын уларытан, улахан баһаарынай массыына турар гаражтаах, караульнай, аһыыр, сынньанар хостордоох, хочуолунайдаах дьиэни үлэҕэ киллэрбиттэр.
Иһин — таһын үлэлииргэ, олорорго үчүгэй усулуобуйалаах оҥорон элбэх үлэни көрсүбүттэр. Павел Павлович бэйэтэ сүүрэн-кѳтѳн, олохтоох дьаһалта матырыйаал биэрэн күүс-кѳмѳ буолан, кыһыннары — сайыннары өрөмүөннээн 2010 сыл от ыйын 1 күнүгэр Дьячковскай Павел Павлович начальниктаах 9 үлэһиттээх Абаҕатааҕы баһаарынай чаас үөрүүлээх аһыллыыта буолбута. Онтон баһаарынай чааһы Степан Иванович Билюкин салайар кэмигэр 77 кв.м. иэннээх “Урал” массыына батар саҥа гараж эмиэ үлэһиттэр бэйэлэрин күүстэринэн тутуллубута. Сыллар баран истэхтэрин аайы депо акылаата түһэн, муостатынан үрэн, дьиэ тымныйан, уопсай мунньах сүбэтинэн саҥа гараж үрдүгэр караульнай помещение туттарга быһаарыммыттар. Манна нэһилиэк дьаһалтата уонна тэрилтэлэрэ күүс-көмө буолбуттара. Начальник Карманов Игорь Гаврильевич салататынан 2015 сыл сааһыттан саҕалаан күһүн бүтэрэн саҥа дьиэҕэ киирбиттэрэ. Ол сыл ахсынньы 28 күнүгэр саҥа “Урал” массыына кэлбит. Онтон гараж ойоҕоһугар турар эргэ депо көтүрүллэн, ол оннугар «Уу баһар» массыына турар уонна үлэһиттэр дьарыктанар спортивнай саалалара оҥоһуллан үлэҕэ киирэр. Кэлин үс сыл устата үлэһиттэр депо тас күрүөтүн тутан, гараж муостата түһэн хаалан цемент муостаны барытын көтүрэн, саҥаттан цемент муоста кутан, депо иннинээҕи былаһаакканы эмиэ барытын цеменнээн күүстээх үлэни көрсүбүттэрэ.
Баһаарынай депо тутулларыгар олохтоох дьаһалта (баһылыктар Михаил Анатольевич Ефремов, Макар Ильич Тимофеев), улуус дьаһалтата (баһылыктар Александр Еремеевич Артемьев, Николай Архипович Архипов), Амматааҕы 9 нүөмэрдээх этэрээт (начальник Александр Борисович Моисеев), нэһилиэк ытык – мааны кырдьаҕастара, олохтоох тэрилтэ үлэһиттэрэ, Дьокуускай куоракка олорор биир дойдулаахтара, урбаанньыт Терентьев Станислав Семенович улахан көмөнү оҥорбуттара диэн буклекка ахтыллар.
Күн бүгүн Абаҕатааҕы 6 №-дээх аҕыйах ахсааннаах баһаарынай чааска начальнигынан Алексей Белолюбскай, караул начальниктарынан Георгий Карманов, Алексей Калашников, Афанасий Осипов, Антон Устинов, суоппардарынан Егор Гоголев, Алексей Гоголев, Евгений Ефимов, Иннокентий Лазарев, Алексей Попов ситиһиилээхтик үлэлииллэр. Баһаарынай сулууспа үлэһиттэрин үөрүүлээх, бэлиэ түгэннэринэн СӨ Судаарыстыбаннай баһаары утары сулууспа начальнига Руслан Босиков, Амма улууһун 9 нүөмэрдээх судаарыстыбаннай баһаары утары сулууспа этэрээтин начальнига Егор Федотов, Абаҕа нэһилиэгин баһылыгын солбуйааччы Степанида Гоголева уонна урут үлэлии сылдьыбыт кэллиэгэлэрэ, тэрилтэ салайааччылара, махталлаах олохтоохтор эҕэрдэлээтилэр.
Бу үтүө күн СӨ судаарыстыбаннай баһаары утары сулууспа туйгуна үрдүк ааты Алексей Белолюбскай, Афанасий Осипов, Егор Гоголев уонна Алексей Попов ыллылар. Маны сэргэ Абаҕа нэһилиэгин дьаһалтатын суоппара Егор Карманов ыксаллаах быһыы-майгыны туоратыыга көхтөөх кыттыытын учуоттаан өрөспүүбүлүкэ сулууспата “Баһаарынай дьыалаҕа кылаатын иһин” диэн түөскэ анньыллар бэлиэни туттарда. Баһаарынай сулууспа “За отличие” мэтээлинэн Егор Карманов, Бочуотунай грамотатынан Алексей Гоголев, Антон Устинов, “Илгэ” ХЭТ суоппара Евгений Степанов, ГУП ОДьКХ Амматааҕы филиалын Абаҕатааҕы учаастагын слесара Алексей Пестерев, Махтал суругунан Евгений Ефимов, Алексей Калашников бэлиэтэннилэр. СӨ Тырааныспарга министиэристибэтин Бочуотунай грамотатынан Алексей Гоголев, Амма улууһун Бочуотунай грамотатынан Алексей Попов, Махтал суругунан Афанасий Осипов, Иннокентий Лазарев, улуустааҕы социальнай уонна ыччат бэлиитикэтин управлениетын Махтал суругунан Алексей Калашников, Абаҕа нэһилиэгин Бочуотунай грамотатынан Антон Устинов, Евгений Ефимов, Махтал суругунан Егор Карманов, Алексей Калашников наҕараадаланнылар. Баһаарынай чаас суоппара Егор Гоголев нэһилиэк сайдыытыгар киллэрбит өр сыллаах кылаатын сыаналаан Абаҕа нэһилиэгин бочуоттаах олохтооҕо үрдүк ааты сүктэ. Онтон Алексей Белолюбскай “Амма киэн туттуута” бэлиэни тутта.
Дьэ бу курдук аҕыйах ахсааннаах баһаарынай чаас үлэһит кэлэктиибэ үбүлүөйүн үөрүүлээхтик бэлиэтээн, кэлбит ыалдьыттарыгар анал өйдөбүнньүк бэлэх оҥорторон бэлэхтээн, бука бары астынан-дуоһуйан, барҕа баҕа санааларын анаан бардылар.
“Амма олоҕо” хаһыат