Амма улууһун айар талааннаах иитээччилэрин айымньыларынан тиһиллибит «Дьоллоох оҕо саас кырдала» диэн хомуурунньук күн сирин көрдө.
Саҥа тахсыбыт хомуруунньугу кытта улуус үөрэҕин үлэһиттэрэ балаҕан ыйдааҕы сүбэ мунньахтарыгар билсэн, сүрэхтээбиттэрэ. Хомуурунньук 131 сирэйтэн турар, түөрт салаалаах: остуоруйалар, кэпсээннэр, хоһооннор, таабырыннар. Бу хомуурунньукка барыта улууспут уһуйааннарыттан 30 айар куттаах иитээччилэр айымньылара киирдилэр. Ордук элбэх иитээччи Амма нэһилиэгин «Сардаана», «Кэнчээри», «Хатынчаана», Соморсун нэһилиэгин «Чэчир», Болугуртан «Колосок», Амма Наахараттан «Дуораанчык» уһуйааннартан, биирдиилээн Сулҕаччы нэһилиэгини «Чычып-чаап», Алтантан «Кэскил», Бөтүҥтэн «Мичээр», ону Сэргэ-Бэс, Абаҕа оскуолаларыттан киирдилэр. Айыллыбыт айымньылар аныгы кэм оҕотугар сөп түбэһэллэр, сахабыт баай тылын-өһүн тириэрдэр аналлаахтар.
Түмүллүбүт айымньылары уопуттаах педагогтар Мария Неустроева, Таисия Жиркова тылларын-өстөрүн көрөн-истэн бэрибиэркэлээтилэр, сүбэ-ама буоллулар. Бу хомуурунньук бэчээккэ тахсарын өйөөбүт үөрэх салалтатын начальнигын солбуйааччытыгар Татьяна Ивановаҕа, таҥан оҥорбут Афанасий Малыкайцевка түгэнинэн туһанан махтанабыт. Саҥа тахсыбыт хомуурунньук иитээччилэргэ, төрөппүттэргэ көмө буолара саарбаҕа суоҕун бэлиэтиибит. Сүрэхтэнии күнүгэр уһуйаан үлэһиттэрэ хомуурунньугу илиилэригэр тутан үөрэн-көтөн бардылар.
Диана Попова, “Cардаана” уһуйаан сэбиэдиссэйин иитэр-үөрэтэр үлэҕэ солбуйааччы: Тылы саамылаан-сааһылаан, сурукка тиһэр уустук буолар, онтон остуоруйа, кэпсээн, хоһоон айар айылҕаттан айдарыылаах, айар талааннаах эрэ киһи ылсан суруйар. Бу хомуурунньукка биһиги «Сардаана» уһуйааммытыттан алта айар талааннаах иитээччилэрбит хоһоонноро, остуоруйалара, кэпсээннэрэ, таабырыннара киирэннэр биһиги үөрүүбүт үрдээтэ. Улууспут уһуйааннарын иитээччилэрэ, кырачааннарга анаан суруйбут айымньылара кыра саастаах оҕоҕо төрөөбүт тылыгар тапталы иҥэрэн, тыл кэрэтин, тыл эгэлгэтин өйдүүргэ уһуйан, оҕо саҥарар дьоҕурун сайыннарар, ону таһынан үлэлии сылдьар оҕо уһуйаанын иитээччилэригэр, төрөппүттэргэ көмө буолан туһалаах суоллаах хомуурунньук буолан тахсыбыт диэн бэлиэтиибин. Улууспут уһуйааннарын айар талааннаах иитээччилэрин бастын айымньыларын түмэн “Дьоллоох оҕо саас кырдалыгар” диэн хомуурунньугу хомуйан оҥорбут коллегаларбытыгар махталбытын тиэрдэбит».
Саргылана Данилова, Соморсуннааҕы “Чэчир” уһуйаан сэбиэдиссэйэ: “Хомуурунньугу Амма улууһун үөрэх салалтатын методическай салаатын сүрүннүүр исписэлииһэ Эмма Давыдова, «Хатыҥчаана» уһуйаан сүрүннүүр иитээччитэ Мария Неустроева уонна «Радуга» уһуйаан логопед- учуутала Таисия Жиркова хомуйан, таҥан — биир идэлээхтэригэр дьоһун бэлэх оҥорбуттар. Үлэлии сылдьар дьоммут айымньылара бэчээттэнэн, үйэтитиллэн тахсыбыта ордук үөрүүлээх, истиҥ махталлаах буолла”.
Анна Ильина, Д.Г. Готовцева аатынан Оҕо сайдар киинин сүрүннүүр иитээччитэ: «Хомуурунньукка киирбит остуоруйалар, кэпсээннэр, хоһооннор, таабырыннар киирбиттэр оҕоҕо үтүөнү уонна мөкүнү араарарга, кэрэни кэрэхсииргэ, төрөөбүт дойдуга тапталы, сиэргэ-майгыга, айылҕаны харыстыырга иитэр суолталаахтара олус кэрэхсэбиллээх. Бу хомуурунньук оҕолорго, иитээччилэргэ, төрөппүттэргэ, учууталларга туһалаах буолара саарбаҕа суох. Идэлэригэр бэриниилээх, күннэтэ сыралаһан үлэлиир иитээччилэр баар буоланнар кэнчээри ыччаппыт сайдар, үүнэр”.
Эмма ДАВЫДОВА