Клара Пантелеймоновна Романова салайааччылаах Өрөспүүбүлүкэтээҕи лиссиэй-интэринээт «КҮН» оҕо хамсааһына Амма улууһун актыбыыс оҕолоругар сахабыт тыла сайдарын түстүүр үрдүк таһымнаах тэрээһини ыытта. Манна улуус 10 оскуолатыттан 87 оҕо кыттыыны ылла.
Эбиэккэ диэри «Күнү кытта тэҥҥэ сырдаа» диэн бэйэни билиһиннэриини көрдөрдүлэр. Ону тэҥэ Ийэ тыл билиҥҥи туругун, инники кэскилин туһунан аһаҕас кэпсэтии буолла. Өрөспүүбүлүкэтээҕи лиссиэй-интэринээт тьютора Сибэкки Аркадьевна Зарвняева иилээн-саҕалаан ыытта. Оҕолор олус көхтөөхтүк кытыннылар, санааларын сайа үллэһиннилэр.
Эбиэттэн киэһэ бөлөҕүнэн үлэ буолла. Манна В.П. Ларионов аатынан Майатааҕы 1 нүөмэрдээх орто оскуола саха тылын уонна литературатын учуутала Александра Романовна Гаврильева өс хоһоонунан сыанка туруоралларыгар сэттэ хамаандаҕа сорудах биэрдэ. Бу кэмҥэ салайааччылары кытта кэккэ кэпсэтии, санаа атастаһыыта буолла. Кэпсэтии түмүгүнэн, Саха Өрөспүүбүлүкэтин күнүн Амма улууһугар муус устар 25 күнүгэр бэлиэтииргэ былааннаатыбыт.
Бу күн Өрөспүүбүлүкэтээҕи лиссиэй-интэринээт тьютора Иван Дмитриевич Бушуев сахалыы ырыа түһүлгэтин түстээтэ.
Зинаида Бураева, Амматааҕы лиссиэй дириэктэрин иитэр үлэҕэ сүбэһитэ, педагог-организатор.