Улуу Кыайыы 79 сылын көрсө Приморскай кыраай Лесозаводск куоратыгар Слава уордьан толору кавалера Тимофей Иванович Скидан аатынан 2012-2013 с.т уонна 2010-2011 с.т оҕолорго волейболга күрэх буолан ааста. Манна Амма 1 нүөмэрдээх орто оскуолатыттан 2012-13 с.т. волейболунан сөбүлээн дьарыктанар уолаттар кыттыыны ыллылар.
Үөрэнээччилэри тренердэрэ Елена Николаевна Константинова илдьэ сырытта. Елена Николаевнаттан күрэх туһунан кэпсииригэр көрдөстүм.
«Уолаттарбын кытта муус устар 28 күнүттэн поеһынан айаннаан ыам ыйын 1 күнүгэр Лесозаводскайга тиийбиппит. Амматтан хамаанда хапытаана Артур Никифоров, Артём Илларионов, Арсен Фёдоров, Дамир Стручков, Арслан Никитин, Рустам Еремеев, Сосин Лёня, Сандал Архипов, Алгыс Баттахов, Дьокуускайтан Айтал Жерготов, Намтан Дамир Андреев аҕатынаан сырыттыбыт. Мин дьарыктыыр оҕолорум саастарыгар 6 хамаанда кииристэ. Түөрт күннээх киирсиигэ 1 миэстэни Хабаровскайтан олимпийскай эрэл хамаандата, 2 миэстэ Благовещенск куораттан «Тайфун», 3 миэстэни Саха сириттэн биһиги «Амма» буоллубут. Уопсай түмүгүнэн Артём Илларионовпыт «Бастыҥ оонньооччу» анал аат хаһаайына буолан сүргэбит өссө көтөҕүлүннэ. Онтон ыам ыйын 5 күнүгэр Лесозаводск «Орбита-1» хамаандата доҕордоһуу көрсүһүүгэ ыҥыран биэс партия оонньоон бэһиэннэрэ кыайан үөрүүбүт улахан.
Биһиги Лесозаводск куоракка фазендаҕа түһэ сырыттыбыт. Куорат аатын курдук маһынан эргинэр эбит. Түспүт дьиэбититтэн маҕаһыыннар, аптека, аһыыр остолобуойдар чугастара сырыыбытын арыый сымнатта.
Төннөрбүтүгэр ыам ыйын 5 күнүгэр поездка олорон баран ыам ыйын 8 күнүгэр Аллара Бэстээххэ кэлбиппит. Түгэнинэн туһанан өрүү өйөбүл буолар төрөппүттэрбэр, оскуолабар улахан махталбын тиэрдэбин! Оҕолорбутун биһиги бары чочуйан улаатыннарабыт буоллаҕа. Кыайыы, призёр буолуу биһиэхэ олох ситиһии!» -диэн ситим нөҥүө сэһэргиир волейбол тренера, олоҕун спортка анаабыт дьүөгэм Лена Константинова.
Эдэр волейболистары, тренеры, төрөппүттэри ситиһиигитинэн эҕэрдэлиибин. Амма волейболун инники эрэллэригэр өссө да элбэхтик үлэлээн, ылбыт кирбиилэргитин ыһыктыбакка үрдүктэн үрдүк дабайыыларга тахсаргытыгар баҕарабыт.
Ирина Корякина — Олесова.