Быйыл өрөспүүбүлүкэҕэ Култуура сылынан Амма нэһилиэгин бочуоттаах олохтооҕо Спартак Трофимов төрөөбүт тылы харыстааһыҥҥа анаммыт үс баннеры оҥорторон айан суолун кытыыларыгар туруортаата.
“Биһиги дьиэ кэргэн сүбэлэһэн баран Аммабыт дьонугар-сэргэтигэр, кэлэр-барар ыалдьыттарга төрөөбүт ийэ тылбыт суолтатын өрө тутан, ону баннерга суруйан аара айан суолларыгар үс сиргэ туруордубут. Ол курдук Амма-Аллараа Бэстээх трассатын, “Амма” айан суолун 7 уонна 6 км, 8-9 км икки ардыларыгар уонна үһүспүт Аммаҕа бетон суолга киириигэ турдулар.
Баннердарбытыгар Иван Гоголев – Кындыл “Тыл диэн норуот бастыҥ баайа, сүрүн киэн туттуута. Тыл диэн норуот Үрүҥ тыына”, Анастасия Варламова “Төрөөбүт төрүт тыл — омук үүнэр-сайдар кэскилэ” уонна Софрон Данилов “Тыл норуот кута-сүрэ. Тыл сүттэ да, норуот сүтэр” диэн бэргэн этиилэрин тутуннубут. Маннык ийэ тыл суолтатын үрдэтиигэ туһуламмыт этиилэрдээх баннердары айан суолугар туруоран салҕаан иһиэхпит. Оннук сыл аайы эбэн иһиэхпин баҕарабын. Бэйэм көҕүлээбит үлэм буоларынан, эргэрэн истэхтэринэ уларытан иһэргэ бэйэм эппиэтинэспэр ылынабын. Бу иитиэхтии сылдьар баҕа санаабын олоххо киллэрэрбэр күүс-көмө буолбут дьоммор, доҕотторбор Никита Семенович Олесовка, “Креатив” рекламнай мастарыскыай салайааччытыгар Дмитрий Афанасьевич Бубякиҥҥа, оҕолорбор, дьиэ кэргэммэр махтанабын. Күннэтэ айан суолунан төһөлөөх киһи ааһара буолуой. Кинилэр бу этиилэри көрөн, тылларын харыстааһыҥҥа, төрөөбүт тылларынан саҥарыыга суолта биэриэхтэрэ, “ээ кырдьык даа оннук ээ” диэн саныахтара диэн бүк эрэнэбин. Ону кытта Амма улууһа төрөөбүт тылга суолта, кинини тыыннаах хаалларыыга суолта биэрэр эбит диэн кэлбит ыалдьыттарбыт өйдүөхтэрэ буоллаҕа”, — диэн Спартак Михайлович бу сонун киллэриитин, көҕүлээһинин туһунан быһаарар.
Чахчы да бу кэнники кэмҥэ төрөөбүт ийэ тылбытынан сайа саҥарарбыт аччаан, букатын сүтэр да кутталга киирбит кэмигэр, маннык суолталаах этиилэр сибиэһэй салгыны эҕирийэр курдук хас биирдии киһиэхэ кутуллуохтара. Онон бэйэтэ саха тыла үөрэхтээх, хас да сыл улууска “Ийэ тыл” түмсүүтүн салайбыт Спартак Трофимов дириҥ суолталаах саҕалааһын оҥорбута холобур эрэ буолуон сөп.
“Амма олоҕо” хаһыат