Күүстээх ардахтар түһэннэр Индигир өрүс хаатыттан тахсан Өймөкөөн улууһун хас да нэһилиэгэ ууга барда. Эмсэҕэлээбит улууска Амма улууһун тыатын хаһаайыстыбатын үлэһиттэрэ көмө оҥорорго бэлэмнэр.
“Биһиги улууспут 2018 сыллаахха сааскы халаан уутуттан улаханнык ууга барбыта. Маныаха өрөспүүбүлүкэ үгүс улуустара бары көмөлөрүн утары ууммуттара. Ол иһигэр тыа хаһаайыстыбатын өртүттэн эмиэ көмө оҥоһуллубута. Онон уу билиэнигэр түбэһии диэн тугун олох үчүгэйдик билэбит. Былырыын эмсэҕэлээбит Нам улууһугар эмиэ бэйэбит көмөбүтүн ыытан турабыт. Тыа хаһаайыстыбатын тэрилтэлэрин кытта кэпсэтэммит, сүбэлэһэн Өймөкөөн улууһугар бэйэбит көмөбүтүн оҥоруохпут. Ол курдук “Амма” СППК 100 киилэ ынах арыытын, Алексаедр Константинович Фомин бааһынай хаһаайыстыбата быйылгы үүнүүттэн 1 тонна хортуоппуйу, улуус бурдугун хаһаайыстыбалара 20 тонна эбиэс бурдугу, тэрээһиннээх хаһаайыстыбалар кыттыһан 30 тонна оту уонна бааһынай хаһаайыстыбалар быйылгы төрүөх 10 ньирэйи биэрэргэ бэлэмнэрин биллэрдилэр «, — диэн этэр улуус тыатын хаһаайыстыбатын управлениетын салайааччыта Ион Кононов.
“Амма олоҕо” хаһыат
Хаартыска: «Хотугу сардаҥа» хаһыат телеграм каналыттан