Амма улууһун тыатын хаһаайыстыбатын управлениета сыллата нэһилиэнньэҕэ сибиинньэ оҕолорун аҕалыыны тэрийэр. Бу да сылга үгэс кэһиллибэккэ, хас да нэһилиэк олохтоохторо бэрт обургу сибиинньэ оҕолорун туттулар.
«Биһиги быйыл эмиэ эрдэттэн сайаапка хомуйбуппут. Хатастааҕы сибиинньэ иитэр комплексы кытта кэпсэтэн 2 уонна 2,5 ыйдаах сибиинньэлэр кэллилэр. Бүгүн муус устар 6 күнүгэр Эмискэ, Аммаҕа, Соморсуҥҥа, Бөтүҥҥэ, Чапчылҕаҥҥа, Абаҕаҕа, Мээндигигэ кэллэ. Уопсайа сүүстэн тахса сайаапка киирбитэ. Күн бүгүн ити нэһилиэктэринэн 82 сибиинньэ оҕото тарҕанна. Сибиинньэ оҕото ыйааһынынан көрөн 12-14 тыһыынча солкуобай. Сайаапка өссө киирэр. Салгыы нэһилиэктэринэн өссө кэлиэ», — диэн тыа хаһаайыстыбатын управлениетын кылаабынай зоотехнига Дмитрий Соловьев билиһиннэрдэ.
«Амма олоҕо» хаһыат