Амматааҕы үөрэх салалтатын көҕүлээһининэн улууспут хас биирдии оскуолатыгар МедиаКииннэр тэрилиннилэр. Манна тыл үөрэхтэригэр дьоҕурдаах, суруналыыс буолуон баҕалаах оҕолор, ону тэҥэ бэйэни салайыныы оҕолоро түмүстүлэр.
Амма оскуолаларын МедиаКииннэригэр киирбит оҕолор олохпут хаамыытынан бэйэлэрин көрүүлэринэн уонна сатабылларынан араас хайысханы тутуһуохтара, суруйар дьоҕурдарын сайыннарыахтара, инники олохторун суолун булуохтара. Ол курдук оскуола иһинэн бэйэ хаһыатын таһаарыахтара, улуус, өрөспүүбүлүкэ хаһыаттарыгар суруйуохтара, социальнай ситимнэргэ тахсыахтара, биидьийэ уонна араадьыйа бырайыактарга ылсыахтара. Бастакы саҕалааһыннар, холонуулар, суруйуулар ааҕааччылар, көрөөччүлэр болҕомтолорун тардан эрэллэр. Оттон хаһыс да сылларын айа-тута сылдьар, суруйарга үөрүйэх үөрэнээччилэр саҥа сүрэхтэнэр оҕолорго холобур буолаллар.
Наталья Бубякина, «Амма олоҕо» хаһыат эрэдээктэр-дириэктэрэ:»Биһиги улууспутугар бары оскуолаларга МедиаКииннэр тэриллибиттэриттэн ордук хаһыат үлэһиттэрэ үөрэбит. Урут-уруккуттан эдэр кэрэспэдьиэннэр пуостара үлэлээн кэлбиттэрэ. Бүгүҥҥү эдэр доҕотторбут инники өттүгэр оскуоланан эрэ муҥурдаммакка нэһилиэктэрин сонуннарын, киэн туттар дьоннорун, ыалларын, уруккуну-хойуккуну, буола турар түгэннэри, араас тэрээһиннэри онтон да атыны сырдатыахтара, биһиэхэ көмө буолуохтара диэн баҕалаахпыт. МедиаКииннэри кытта ыкса үлэлиир, күрэхтэһии ыытар былааннаахпыт. Хаһыаппыт, сайтпыт матырыйаалларын байыталларын таһынан оҕолор нэһилиэнньэ, оскуолалар улуустарын «Амма олоҕо» :хаһыакка сурутууга көмөлөһүөхтэрэ. Манна туспа түмүгү ахсынньы ый бүтүүтэ таһаарыахпыт. Ону бэлиэтиэхпит. Онтон уопсай күрэх түмүгүн кыайыылаахтара үөрэх дьылын бүтүүтүгэр «Саха» национальнай көрдөрөр-иһитиннэрэр хампаанньаҕа экскурсияҕа барыахтара, тэлэбиидэнньэ дириэктэрэ Олег Колесов-Талбан оҕолору бэйэтэ көрсүөҕэ. Оҕолорбут олус үчүгэйдик үлэлииллэр диэн бэлиэтиибит. Амма Наахара, Бөтүҥ, Мээндиги, Соморсун, Эмис онтон да атын оскуолалар оҕолоро суруйаллар, саҥа күүһүнэн үлэлээн эрэллэр. Оҕолорго МедиаКиин көмөтө улахан буолуо диэн эрэнэбит. Бу оҕолорбут биһиги инники кадрдарбыт буолуохтара. Бука бары суруналыыс буолбаталлар да, бу идэни талбыттар син биир баар буолуохтара. Биһиги эйгэбит, үлэбит төһө да сыралааҕын иһин олус интэриэһинэй, күннэтэ араас түгэннэринэн оргуйа олорор уратылаах».
Жанна Леонтьева, Н.Е.Мординов-Амма Аччыгыйа аатынан «Кэскил»оҕо бэчээтин кыһатын коммуникацияны хааччыйар салаатын сүбэһит-эрэдээктэрэ: «Амма улууһугар медиа-кииннэр тэриллибиттэрин туһунан үтүө сонуну үөрэх салалтатын эппиэттээх үлэһитэ Алтана Артемьева иһитиннэрбитин үөрэ истибитим. Медиа-кииннэммит дьон быһыытынан аны сурутууга хоннохтоохтук ылсыахтара диэн эрэнэбин. Хас биирдии оскуолаҕа медиа-киин иһинэн төрөппүтү, дьиэ кэргэни кытыаран туран, «Сурутуу» күнүн ыытаргытыгар баҕарабын, ыҥырабын. Чуолаан, оҕо бэчээтин болҕойуҥ: кыраларга «Чуораанчык», «Колокольчик» сурунааллары, орто сүһүөх кылаастарга «Кэскил» хаһыаты, «Бэлэм буол» сурунаалы, үрдүкү кылаастарга нууччалыы-аангылыйалыы «Юность Севера» научнай-популярнай сурунаалы. Тус бэйэм үгүстүк Бөтүҥтэн «Платформа» медиа-киин оҕолорун үлэлэрин бэрийэн таһаарабын. Суруктара мэлдьи үчүгэй, «тыыннаах», тупсаҕай хаартыскалардаах, түһэриилэрдээх буолар. Былырыыҥҥы да үөрэх дьылыгар кинилэр көхтөөхтүк суруйбуттара. Ону таһынан Мээндигиттэн, Эмистэн медиа-кииннэр көхтөөхтөр, биһигини кытары ситимнээхтик үлэлииллэр. Кэлин Абаҕаттан, Чакыртан суруйар буолан эрэллэр. Амма педагогтара «Учуутал аргыһа» хаһыакка, «Вконтакте» сирэйгэ сонуннарын, үлэлэрин уопуттарын, үөрэхтэрин үллэстэллэр, тахсаллар, чуолаан, О.П.Иванова-Сидоркевич аатынан айар сайдар киин дириэктэри солбуйааччыта Феврония Владимировна Данилова тус бэйэтинэн тахсан «Бэлэм буол» сурунаалга сурутууну ыытааччы. Ити курдук аны тэрилтэнэн, оскуоланан бүттүүн сурутууга ылсаргытыгар баҕарабын. Сайын Аммаҕа олус үчүгэй, мааны тэрээһин Олоҥхо ыһыаҕа ыытыллыбыта. Ону көрсө «Бэлэм буол» 6-с нүөмэрэ Амма улууһугар анаммыта. Оҕо бэчээтэ диэн сэдэх көстүү. Бэрт аҕыйах региоҥҥа оҕо бэчээтэ диэн баар, онон баары сатаан туһанарга, ааҕарга, билиини чиҥэтэргэ көхтөөхтүк ылсыаҕыҥ. Бу күннэргэ сурутуу үгэнэ, олохтоох почтаҕа, биһиэхэ да ситимҥэ тахсан, оҕолору ааҕыы эйгэтигэр угуйа, уһуйа туруоҕуҥ, сыллааҕы сурутууну оҥорторуоҕуҥ, бэлэхтиэҕиҥ!!! Элбэх оҕолоох, кыаммат-түгэммэт дьоҥҥо сурутуу бэлэхтиир үгэс уруккуттан баар, ону сөргүтүөҕүҥ. Амма улууһугар оҕо бэчээтигэр сурутуу күргүөмнээхтик, көхтөөхтүк аастын!
Алтана Артемьева.