Улуустааҕы үөрэх салалтата, нэһилиэнньэ дьарыктаах буолуутун киинэ уонна биисэнэс-инкубатор кыттыгас улуустааҕы улахан бырайыактара иккис сылын ыытылынна. Бу сылга улууспут15 оскуолаларын 6-11 кылаастарын үөрэнээччилэрэ барыта 401 оҕо 20 тэрилтэҕэ сылдьан идэлэр тустарынан эбии өйдөбүллэри ыллылар, үлэ миэстэтин көрдүлэр, элбэҕи туоһуластылар, дьарыктары аастылар.
Оскуола оҕолоругар идэни талыыга анаммыт «Аммаҕа профтур» бырайыагынан ис дьыала салаатыгар 102 (эпп. Людмила Малыкайцева), улуус дьаһалтатыгар 69 (эпп. Евгения Аргунова), биисэнэс инкубаторга 62 (эпп. Елена Ногнорутова), «Мин биисэнэһим» кииҥҥэ 62 (эпп. Александра Николаева), баһаарынай чааска 58 (эпп. Прокопий Артемьев), нолуок сулууспатыгар 56 (эпп. Василина Стручкова), бэтэринэриийэ салалтатыгар 51 (эпп. Сахая Старостина), улуустааҕы кииннэммит балыыһаҕа 41 оҕо (эпп. Марфа Пинигина) сылдьаннар бу хайысхаларга оҕолор ордук интэриэстээхтэрин биллэрдилэр. Маны таһынан профтур кыттыылаахтара «РИК Автодор» (эпп. Антонина Петрова), борокуратуура (эпп. Антонина Васильева), Ф.Ф.Потапов аатынан норуот айымньытын дьиэтигэр (эпп. Фекла Санникова), улуустааҕы бибилиэтиэкэҕэ (эпп. Лариса Винокурова, Алена Семенова), ОДьКХ-ҕа (эпп. Андрей Андреев), суут бириистэптэргэ (эпп. Елена Тарабукина), ойуур хаһаайыстыбатыгар (эпп. Виктория Федорова) , «Якутлесресурс» (эпп. Егор Слепцов), оҕо сайдар киинигэр (эпп. Феврония Данилова), «Россельхозбааҥҥа» (эпп. Анна Макарова), «Амма» астыыр-үөллүүр кэпэрэтиипкэ (эпп.Нюргуяна Данилова) эмиэ сылдьаннар элбэх саҥаны, сонуну биллилэр. Хас да хайысханан дьарыктанар урбаанньыт Майя Олесова үлэтин-хамнаһын сэҥээрэн көрдүлэр, бэйэ дьыалатын тэринэргэ сүбэлэри ыллылар. Профтур иһинэн Арктикатааҕы судаарыстыбаннай култуура уонна ускустуба институтугар (салайааччы Дария Кириллина) 99 оҕо сылдьан устудьуоннар дьоҕурдарын көрдүлэр, кинилэр ыыппыт маастар кылаастарыгар кытыннылар, элбэх оҕо бу үөрэххэ туттарсар баҕа санааларын эттилэр. Устудьуоннары кытта көрсүһүүнү оҕо ускуустубатын оскуолатын дириэктэрэ Любовь Заварзина үрдүк таһымҥа тэрийдэ.
«Аммаҕа профтурга» оҕолор элбэх идэлэри кытта билсэллэригэр кыах бэриллэр. Бу күн оҕолор бэйэлэрэ интэриэһиргиир элбэх тэрилтэлэригэр сылдьаллар. Профтур Аммаҕа ыытыллара диэн оҕолор бэйэбит улууспутугар ханнык идэлэр наадаларын билэллэригэр уонна үөрэнэн баран төттөрү дойдуларыгар кэлэллэригэр улахан оруоллаах. Инники өттүгэр тэрилтэлэрбит устудьуоннары тус сыаллаах үөрэтии бырагыраамаларынан оҕолорбутун араас идэлэргэ үөрэттэрэн иһиэхтэрэ диэн эмиэ эрэл санаалаахпыт,» — диэн этэр нэһилиэнньэ дьарыктаах буолуутун киинин исписэлииһэ Александра Софронова.
Алтана Артемьева.