Бүгүн ыам ыйын 14 күнүттэн, Амма улууһун бары нэһилиэктэринэн сарсыардааҥы эти- хааны чэбдигирдэр эрчиллиилэр саҕаланнылар. Эрчиллиилэр саҕаламмыттарын үөрүүлээхтик Албан Аат болуоссатыгар арыйдылар.
Сарсыарда 7 чаастан саҕаламмыт бастакы эрчиллиилэри оҥоро кэлбит дьону улуус баһылыгын бастакы солбуйааччы Василий Бураев, физическэй култуураҕа уонна спорка управление салайааччыта Дмитрий Наумов эҕэрдэлээтилэр. Маннык эрчиллиилэр аны бу күнтэн ыла саҕалаан нэдиэлэҕэ ыытыллыахтара. Амма нэһилиэгин олохтоохторун анал исписэлиистэр «Амма-Олимп», элбэх функциялаах саала былаһааккатыгар уонна Албан Аат болуоссатыгар күүтэллэр. Ким ханна олорорунан, табыгастааҕынан көрөн кэлэн сарсыардаттан эрчиллэн, этин-хаанын уһугуннаран, үлэтигэр үөрэ-көтө барар кыахтаах. Итини сэргэ нэһилиэктэргэ эмиэ сарсыардааҥы эрчиллиилэр саҕаланан дьон-сэргэ үөрэ-көтө кэллэ. Этэргэ диэри , хамсаныы — бу олох буоллаҕа.
«Бүгүн наһаа үчүгэй сарсыардаттан чаҕылхай, сылаас күн туран Албан Аат болуоссатыгар кэлэн эрчилиилэри оҥордубут. Эрчиллиилэри биһиэхэ улууспут физическэй култуураҕа уонна спорка управлениетын салайааччыта Дмитрий Наумов, оҕо спортивнай оскуолатын тренерэ Афанасий Адамов уонна улууспут баһылыгын бастакы солбуйааччы Василий Бураев оҥортордулар. Бары эппитин-сииммитин уһугуннарар хамсаныылары оҥорон астынныбыт. Сорохтор эрдэ хаалыктаах хаамыынан хааман кэлбиттэр. Кэнники кэмҥэ дьон спорт араас көрүҥүнэн дьарыктанар буолбута хайҕаллаах. Быраастар этэллэринэн биһиги доруобай сылдьыыбыт бэйэбититтэн тутулуктааҕа 80 бырыһыан. Онно бу маннык эрчиллиилэр олус туһалаахтар. Киһи хамсана-имсэнэ сырыттаҕына чэбдик, сэниэлээх буолар. Ордук олорон эрэ үлэлээх дьоҥҥо. Онон улууспутугар бу курдук доруобуйаҕа туһалаах тэрээһиннэр саҕаламмыттара үчүгэй. Маннык сыллата ыытыллар буолбута хайҕаллаах. Бу Бүтүн Арассыыйа үрдүнэн ыытыллар тэрээһин. Амма улууһугар сарсыардааҥы эрчиллии атырдьах ыйыгар диэри ыытыллыахтара. Бука бары сэрээккэҕэ!», — диэн улуустааҕы архыып салаатын салайааччыта Катерина Окорокова санаатын үллэһиннэ.
Мээндиги
Амма Наахара
Амма Наахара
Болугур
Абаҕа
«Амма олоҕо» хаһыат