Амматааҕы Н.С. Захаров -Сахаачча аатынан оҕо спортивнай оскуолатыгар «АҺаҕас аан» күннэрин чэрчитинэн Дьокуускайтан СӨ үтүөлээх тренерэ, цигун уонна тайцзицюань гимнастикаларын сертификаттаах тренерэ Аркадий Прокопьев кэлэн дьарык оҥордо, бу гимнастикалар туҺунан кэпсээтэ.
Үтүөлээх тренер, улуу кытай норуота хас да тыҺыынча сыл анараа өртүттэн үөрэтэн, сайыннаран илдьэ кэлбит хамсаныы, тыыныы, өй үлэтин барытын түмэр гимнастика киҺиэхэ дьайыытын, туҺатын туҺунан бэрт сиҺилии кэпсээтэ. Дьарыкка спортивнай оскуола иитиллээччилэрэ, тренердэрэ уонна интэриэҺиргиир дьон сырыттылар, эти -хааны чэбдигирдиигэ боростуой ньымалары биллилэр.
«Миигин оҕо спортивнай оскуолатын дириэктэрэ Дмитрий Петрович Неустроев уонна солбуйааччыта Виктория Жилиновна Владимирова ыҥырбыттара. Бэйэм өр сыл спорт эйгэтигэр тренеринэн да, салайар да үлэҕэ үлэлээбитим. Бу цигун уонна тайцзицюань кытай гимнастикатын өр сыл үөрэппитим. Кытайга, Арассыыйа улахан да куораттарыгар баран маастардарга дьарыктаммытым. Билигин манна сертифицированнай тренер буолабын. Дойдубар, дьоммор кэлэн бу гимнастика сүрүн үс ньыматын көрдөрдүм кэпсээтим. Сылдьыбыт дьон астынна, сэргээтэ. Уопсайынан киҺи бэйэтин доруобуйатын, этин сиинин, өйүн-санаатын бэйэтэ көрүнэ, хонтуруоллана сылдьыахтаах. Онуоха ханнык баҕарар киҺиэхэ күннээҕи олоҕор, спортсменнарга да бу цигун, тайцзицюань гимнастика көмө буолуон сөп. Ол курдук киҺи өйүн -санаатын түмэн этин-хаанын чэбдигирдэр хамсаныылары тыыныытын уонна өйүн үлэтин кытары дьүөрэлээн оҥорор, бэйэтин туругун салайа үөрэнэр. Ол барыта холбостоҕуна киҺи бэйэтин туругун тупсарынар, араас тас дьайыыга бэриммэт буолар»-, диэн Аркадий Тихонович санаатын үллэстэр.
«Амма олоҕо» хаҺыат