Нерюнгри куорат Таастаах сиригэр-уотугар Олоҥхо ыһыаҕар ыытыллыбыт батыйаны тургутар күөн күрэскэ уустар ортолоругар Чапчылҕантан Александр Карамзин оҥоһуга бастыҥынан ааттанна.
Олоҥхо ыһыаҕын биир үгүс дьону тардар, кэрэхсэтэр күрэҕинэн уустар күрэхтэрэ буолар. Быйыл эмиэ манна уустар түһүлгэлэрэ арыллан, тимирдээх таастан болгуо уһаарыытыгар Ил Дархан Айсен Николаев кыттыыны ылла. Санатан эттэххэ ааспыт сылга Аммаҕа ыытыллыбыт Олоҥхо ыһыаҕар эмиэ болгуо уһаарыытыгар кыттан Айсен Сергеевич 11 киилэттэн тахсалаах болгуону балталаабыта. Амма улууһун тимир уустарын түмсүүтүн салайааччыта Роман Алексеев иһитиннэрбитинэн, Олоҥхо ыһыаҕар Амматтан 11 уус баран кыттыыны ылбыттар. Уустар батыйаларын тургутар күрэхтэригэр барыта сэттэ уус кытынна.
Ол курдук «Батыйа — эр хоһуун санаа уонна үрдүк таһым бэлиэтэ» күөн күрэскэ уустар бэрээдьинэ быаны 15 төгүл бысталаатылар, ыйанан турар быаны иккитэ быһа оҕустулар, 2,5 см халыҥнаах боолдьоҕу быһа баттаатылар, түмүккэ 15 см уҺуннаах, 10 см кэтиттээх бурууһу быһыта оҕустулар. Дьэ манна хайаларын батыйата сытыыта, уус бэйэтэ да туттара-хаптара барыта биллэр. Бу күрэххэ Амма улууһун чиэһин көмүскээбит тимир ууһа Александр Карамзин бастыҥ бириэмэни көрдөрөн, батыйата да саамай бастыҥынан, бары ирдэбиллэри тутуһан оҥоһуллубут буолан бастакы миэстэни ылары ситистэ. Санатан эттэххэ, Александр быйыл Аммаҕа Кыайыы ыһыаҕар ыытыллыбыт өрөспүүбүлүкэтээҕи быһах күрэҕэр тоҕус уус кыттыбытыттан иккис миэстэни ылбыта.
“Батыйабын сааскыттан оҥорон саҕалаан,Нерюнгригэ барыам эрэ иннинэ бүтэрбитим. Биитин уһуна 27 см. Кэтитэ угун аттынан 1 см, онтон төбөтүн диэки 5 мм, кэтитэ 5 см. Угун уһуна саамай уһаабыта 50 см буолуохтаах. Онтон уһун буолуо суохтаах. Миэнэ 40-тан тахса см. Үчүгэй баҕайы күрэх буолла. Нерюнгри бэйэтэ айылҕата да атын эбит. Ыһыах буолбут сирэ үрдүк сиргэ турар, аллараа үрэх уста турар. Туспа ураты көстүү”, — диэн Александр санаатын үллэстэр.
«Амма олоҕо» хаһыат