Амма уопсастыбаннай үлэҕэ көхтөөх далбардара өрөспүүбүлүкэтээҕи научнай-практическай кэмпириэнсийэҕэ кытыннылар, санааларын атастастылар.
“Быйылгы кэмпириэнсийэ Суорун Омоллоон аатынан опера уонна балет тыйаатырыгар Саха сирин үлэһит дьахталларын I сийиэстэрэ буолбута 100 сылыгар ананан ыытылынна. Биһиги Амма улууһун уопсастыбаннай түмсүүлэриттэн 23 буолан кытынныбыт. Дэлэгээссийэбитин улуус баһылыгын социальнай боппуруостарга солбуйааччыта Ньургуйаана Ивановна Илларионова салайан илдьэ сырытта.
Кэмпириэнсийэ бастакы күнүгэр кэрэ аҥардар ким баҕалааҕынан бэйэлэрин доруобуйаларын көрдөрдүлэр. Научнай-практическай кэмпириэнсийэни Саха сирин дьахталларын Сойууһун бэрэссэдээтэлэ Анжелика Егоровна Андреева салайан ыытта. Кэмпириэнсийэ “Трансформация гражданской, политической и социальной роли женщин в прошлом и будущем” диэн тиэмэҕэ ыытылынна. Бастакы чааһа Саха сирин үлэһит дьахталларын 100, Улуу Кыайыы 80 сылларыгар ананна. Манна олохпут инники кэскилин торумнуур кэпсэтиигэ, гражданскай активноска дьахтар оруолун үрдэтии, үлэ хайысхатын чопчулуур, дьон -сэргэ доруобуйата, олоҕо тупсарын, баар итэҕэстэри, туоратыы, үлэҕэ наставниктар оруолларын үрдэтии, Сахабыт сирин сайдыытын туоһулуур араас хабааннаах үлэни ыытыыга тустаах дьон дакылааттарын иһиттибит. Онно тахсыбыт кэпсэтии, ырытыы түмүктэринэн биир санаанан резолюция ылынныбыт. Саха сирин дьахталларын союһун бэрэссэдээтэлэ. Бу күн элбэх оҕолоох ийэлэргэ, көхтөөх далбардарга наҕараадалары туттардылар. Кэмпириэнсийэттэн элбэҕи билэн, бэйэбит курдук үлэлиир түмсүү чилиэннэрин көрсөн кэпсэтэн, сэргэхсийэн, инники үлэбитигэр саҥа былааннары торумнаан кэллибит”. – диэн Сулҕаччы нэһилиэгин көхтөөх далбара, “Арассыыйа ийэлэрэ” хамсааһын Сулҕаччы нэһилиэгэр куратора Вера Исакова сырдатта.
Кэмпириэнсийэ кэмигэр Амма көхтөөх кэрэ аҥардара эмиэ бэлиэтэннилэр. Ол курдук “Арассыыйа ийэлэрэ” уопсастыбаннай хамсааһын Амма улууһугар салаатын салайааччыта, өрөспүүбүлүкэ уопсастыбаннай палататын чилиэнэ Оксана Архипова Арассыыйа Бэрэсидьиэнин, “Аҕа дойду көмүскээччилэрэ” судаарыстыбаннай фонда Амма улууһугар социальнай координатора Саргылана Константинова СӨ Үлэ уонна социальнай сайдыы министиэристибэтин, улуус Мунньаҕын дьокутаата, урбаанньыт Эльвира Пестерева СӨ ыччакка уонна социальнай коммуникацияларга министиэристибэтин Махтал суруктарынан, онтон Амматааҕы кииннэммит бибилэтиэкэ сүрүн бибилэтиэкэрэ, өр сыл Амма улууһун дьахталларын Сэбиэтин салайбыт Вероника Стручкова “Саха сирин дьахталларын хамсааһынын сайдыытыгар кылаатын иһин С.Е. Николаева аатынан” анал бэлиэнэн наҕараадаланнылар.
“Амма олоҕо” хаһыат