«Амма олоҕо» хаһыакка сыл иккис аҥарыгар, ол эбэтэр от ыйыттан ахсынньы ыйга диэри сурутуу салҕанар. Билигин суруттаххына, улуус сонуннарын саҥа сылга үктэниэххэр диэри ааҕар кыахтааххын. “СӨ судаарыстыбаннай сакааһын сулууспата” генеральнай дириэктэрин солбуйааччы Дмитрий Иванов Дьокуускай куоракка олорон улууһун хаһыатын аахсыйатыгар кыттыһан, бу түгэни мүччү туппата.
“Мин төһө да Амматтан бардарбын, улууспун умнубаппын. Онно “Амма олоҕо” хаһыаты сурутан ааҕабын, сонуннары да көтүппэппин. Үлэлээх киһиэхэ биллэн туран ааҕар бириэмэ көстөөччү суох. Ол да буоллар, киэһэ арыый нам-нум буоллахха, хаһыаппын ылан ааҕабын. Кумааҕы хаһыаты уруккуттан сөбүлүүбүн. Электроннайдааҕар быдан ордук. Хаһыат ыытар аахсыйатыгар кыттыһан, этии киирэн, Дьокуускайга баар “Алмаз” чэбдигирдэр кииҥҥэ үс хаһыаты бу сыл иккис аҥарыгар уонна бэйэбэр салгыы эмиэ суруттум. Чэбдигирдэр кииҥҥэ элбэх аммалар бааллар эбит. Кинилэр улуустарын сонунун билэ олоруохтара. Аны аҕыйах хонугунан Аммабытыгар Олоҥхо ыһыаҕа ыһыллаары турар. Дьэ ол туһунан уонна кэнники да интэриэһинэй сонуннары барытын — барытын “Амма олоҕо” хаһыаттан сыта-олоро тутан олорон ааҕыахха сөп. Дьокуускай куоракка олорор биир дойдулаахтарбар, улуускут хаһыатын сурутан ааҕын, дойдугутун кытта биир ситимҥэ олоруҥ диэн ыҥырабын”, — диэн Дмитрий Дмитриевич санаатын тириэртэ.
Өрөспүүбүлүкэбит араас муннуктарыгар, Дьокуускайга олорор биир дойдулаахтарбытын хаһыаккытыгар сурутарга ыҥырабыт. Сыл иккис аҥарыгар толору сурутууга олох аҕыйах кэм хаалла. Билигин почта эһиги ханна суруппут аадырыскытыгар чопчу тириэрдэр.
“Амма олоҕо” хаһыат