Дьокуускай куоракка СӨ Ойуулуур-дьүһүннүүр искусствотын түмэлигэр В.Г. Короленко аатынан Амма 1 нүөмэрдээх орто оскуолатын Л В.Киренскэй аатынан кыраайы үөрэтэр түмэл салайааччыта Вера Бессонова «Кэм туоһулара» диэн «Раритеты Амгинского улуса» быыстапка иһинэн авторскай экскурсиятын бэрт сэргэхтик уонна үрдүк таһымнаахтык ыытта.
Олус интэриэһинэй уонна сэргэх экскурсияҕа барыта 50 тахса киһи сырытта. Ол иһигэр билим дуоктара Анатолий Жожиков, Амма орто оскуолатыгар дириэктэринэн 90 -с сылларга дириэктэрдээбит Лидия Петрова, педагогическай үлэ бэтэрээннэрэ, Ем.Ярославскай аатынан Саха түмэлин салайбыт Егор Спиридонович Шишигин кэргэнэ, култуура бэтэрээнэ Анна Шишигина, Амма улууһун архыыбын өр кэмҥэ салайбыт Екатерина Аманатова уонна да атын убаастабыллаах биир дойдулаахтарбыт Вера Нестеревна кэпсээнин олус сэргээн иҺиттилэр, билиилэрин хаҥаттылар.
«Бу быыстапкаҕа элбэх экспонаттар турбуттар. Вера Нестеровна кэлбит дьон болҕомтотун тардар гына экскурсиялары бэрт интэриэһинэйдик сырдаппытыгар улахан махтал! Биһигини историяҕа, географияҕа, саха тылыгар үөрэппит чулуу учууталларбыт бэйэлэрин кэмигэр элбэх да араас предметтэри ( кэлин экспонаттар буолбут) муспут эбиттэр. Академик Киренскэй аатын сүгэр оскуолатааҕы музей атаҕар турарыгар олук уурдахтара. Ол курдук Илья Саввич Петров, Маркел Тихонович Михайлов, Евгений Гаврильевич Афанасьев, Алексей Хрисанфович Давыдов, Михаил Александрович Расторгуев, Евдокия Ивановна Бессонова, Мария Михайловна Никитина, онтон да ааттарын долгуйа иһиттибит… Маннык быыстапкаларга сылдьан киһи элбэх саҥаны сомсор, билэр, духовно байар, сайдар» -диэн санаатын үллэстэр Анна Афанасьевна Шишигина.
«Вера Нестеровна үлэ бөҕөнү оҥорбут, түмэл экспонаттарын барытын ырытан, үөрэтэн, хантан көстүбүтүн, кимтэн ылбытын түмэл фондатыгар киллэрбит. Бу улахан үлэттэн тахсар. Вера Нестеровна бэйэтэ омук тылын учуутала уонна кэлин бу түмэли салайа сылдьар. Учуутал буолан саҥата-иҥэтэ лоп- бааччы, киһи сэҥээрэн истэр. Түмэлбит өссө да баай экспонаттарынан эбиллэн истин», -диэн махтал тылларын Екатерина Васильевна Аманатова тириэрдэр.
Сарсын балаҕан ыйын 7 күнүгэр П.А. Ойуунускай аатынан литература түмэлигэр Арассыыйа норуоттарын тылларын күнүгэр анаммыт «Мосты над Леной» диэн тэрээһин ыытыллар. Бу тэрээһиҥҥэ Вера Нестеревна Аммабытыгар кэлэн сыылкаҕа олорон үйэлээх айымньыларын суруйбут нуучча улуу суруйааччыта Владимир Галактионович Короленко туһунан кэпсиэҕэ.
Бу курдук “Раритеты Якутии. Амгинский улус” диэн быйыл тахсыбыт альбом –каталогпыт чэрчитинэн тэриллибит быыстапкаҕа иккис улахан экскурсиябыт ситиһиилээхтик ыытылынна. Санатан эттэххэ, бу иннинэ улуус тимир уустарын түмсүүтүн салайааччыта Роман Алексеев эмиэ олус интэриэһинэй экскурсияны ыыппыта. Быыстапка өссө балаҕан ыйын 20 күнүгэр диэри ойуулуур-дьүһүннүүр түмэлгэ туруоҕа. Кэлэн көрүҥ, сэргээн.
Ньургуйаана ИЛЛАРИОНОВА