Бүгүн саха политическай деятелэ, саха литэрэтиирэтин төрүттээччи Платон Алексеевич Ойуунускай төрөөбүт күнэ. Мин эһэм бибилэтиэкэтигэр баар Ойуунускай 1936 сыллаахха тахсыбыт кинигэтэ олус күндү.
Эһэм, кыраайы үөрэтээччит Давыдов Алексей Хрисанфовичтан хаалбыт бибилэтиэкэтигэр Былатыан Ойуунускай «Хоһооннор» диэн кинигэтин булан олус сэҥээрэ көрдүм. Бу кинигэ 1936 сыллаахха латыынныы тылынан, 6000 тиражтаах судаарыстыбаннай үөрэтэр -педагогическай издательствоҕа бэчээттэнэн тахсыбыт эбит. Туруга билигин да үчүгэй, киһи ааҕыан сөп. Кинигэ уруһуйун А. И. Малушина уруһуйдаабыт.
Бу кинигэтигэр Ойуунускай саҥа былааһы уруйдуур хоһооннорун тиһэн киллэрбит. Мин кини Амма улууһугар буолан ааспыт гражданскай сэрии тиэмэтигэр суруйбут хоһооннорунан, ол курдук «Өрүөл кэриэһэ», «Харачаас», «Мин бэркэ ытабын» уонна да атыттарын алын кылааска үөрэнэ сылдьан дакылаат суруйбутум. Былатыан Ойуунускай суруйбут айымньылара билигин да суолталаахтар. Мин кини бары өттүнэн талааннааҕыттан сөҕөбүн. Бүгүн өссө “Саха ” НКИХ ханаалыгар «Саҥа күн» биэриитигэр Платон Алексеевич экэнэмиис буоларын биллим. Биэриигэ дойду эконочимескай тутулун анаарбытын кэпсээтилэр.
Улуу убайбыт Былатыан Ойуунускай айымньыларын үөрэтиҥ диэн бэйэм саастыылаах оҕолорбун ыҥырабын. Тоҕо диэтэр дойдубут инникитин уһансыбыт дьоннор олохторун өрүү билиэх тустаахпыт.
Сардана ДАВЫДОВА, Л.В. Киренскэй аатынан Амма лиссиэйин 11 кылааһын үөрэнээччитэ