ОДьКХ Амматааҕы филиалын үлэһиттэрэ дьиэлэргэ сылааһы биэрии иннинэ нэһилиэктэргэ тахсан балаһыанньаны билсэллэр. Бу күннэргэ производственнай-техническэй отдел начальнига Сергей Емельянов Эмис нэһилиэгэр үлэлээтэ. Ордук улахан болҕомтону саллааттар дьиэлэригэр ититиини киллэриигэ туһаайда.
Отдел начальнига олохтоох учаастак начальнига Степан Новиковы кытта икки хочуолунай туруктарын, өрөмүөн хаамыытын көрдүлэр. Сергей Николаевич бастатан туран нэһилиэк дьаһалтата ОДьКХ генеральнай дириэктэрэ Виталий Чикачевка түһэрбит сайаапкатынан анал байыаннай дьайыы байыастарын дьиэлэрин киин ититэр ситимҥэ холбооһуну үөрэттэ. Игнат Устинов, Николай Уваров, Александр Золотов, Петр Солдатов дьиэлэригэр турба ааһыахтаах сирдэрин, төһө матырыйаал ороскуоттаныаҕын, турба суолу туоруохтаах сирин көрдө-иһиттэ.
Бу күннэргэ Эмис нэһилиэгин ОДьКХ үлэһиттэрэ тыа сирин дьонун олохторун тупсарар үлэлэргэ умса түһэ сылдьаллар – “Умсааннаах” учаастак олохтоохторун сылааска холбооһун барар, итиэннэ хочуолунай күүһүн учуоттаан өссө биэс ыалга ититии биэрэри үөрэтэллэр. Эһиил хочуол, циркуляционнай насос кыаҕын күүһүрэн ититиини өссө элбэх ыалга киллэрэр соруктаах үлэлииллэр.
Бу курдук, Эмистээҕи ОДьКХ үлэһиттэрэ өрөмүөн, үлэ үөһүгэр сылдьаллар.
“Амма олоҕо” хаһыат.