Бүгүн ойуур Арассыыйаҕа ойуур авиациятын үлэһиттэрин күнэ бэлиэтэнэр. Өҥүрүк куйаас күннэр тураннар күөх ойуурбут умайбатын, баһаар тахсыбатын туһугар үлэлэһэр дьоммут идэлээх күннэрин үлэ үөһүгэр көрсөллөр.
“Амма улууһугар ойуур авиацията 50-с сыллар саҕаланыыларыгар тэриллибитэ уонна күн бүгүнүгэр диэри ойуур көмүскэлигэр күннэтэ көтө, үлэлии сылдьабыт. Биллэн туран ол кэмтэн ыла уларыйыы бөҕө таҕыстаҕа дии. Билигин отделениебытыгар уопсайа 12 парашютист, 30 десантник, 2 суоппар, 2 радиооператор, 3 кэтээн көрөөччү летчик үлэлиир. Онон балайда улахан кэлэктиип буолабыт.
Волгоград куораттан “МИАН” тэрилтэ АН-2 сөмөлүөтэ күннэтэ көтөр. Тэрилтэ маннык дуогабарынан кэлэн 2014 сыллаахтан ыла үлэлиир. Этэргэ диэри Амма иккис дойдулара буолла, сирин-уотун да бэркэ билэр буоллулар. Көтүү Нестерев шкалатынан кылааһынан көтүү буолар. Төһө куйаас турарынан 1-5 кылааска диэри мээрэйдэнэр. Төһүү сөрүүн буолар да кылаас кыра буолар. Ол курдук билигин улууспут территориятыгар баһаартан сэрэхтээх буолуу 4-с кылааһа олохтонон турар. Онон күн аайы көтөбүт. Баһаар бэлиэтэнэ илик буолан күҥҥэ биирдэ көтөбүт. Территориябытын 3,5 чаас устата көтөн кэлэбит. Билигин этэрээппититтэн 15 десантник ыаллыы сытар баһаардаах Уус Майа улууһугар баар. Өссө бүгүн 15 киһи Тааттаҕа көтүөхтээхтэр. Бүгүҥҥү идэлээх күммүтүнэн бэтэрээннэрбитин, кэлэктииппин истиҥник эҕэрдэлиибин уонна бары этэҥҥэ буолалларыгар баҕарабын. Нэһилиэнньэҕэ туһаайан олус итии күннэр туралларынан ойуурга сылдьан уоту туттартан сэрэхтээх буолуҥ диэн ыҥырабын” , — диэн этэр Амма улууһун ойуур авиациятын старшай кэтээн көрөр летчигэ Николай Захаров.
«Амма олоҕо» хаһыат