VIII “Азия оҕолоро” норуоттар икки ардыларынааҕы спортивнай оонньууларга спортивнай хамаандалары сэргэ араас регионнартан волонтердар талыллан кэлэн араас хайысханан үлэлии-хамсыы сылдьаллар. Уопсайа оонньууларга күүс-көмө буолан 1900 волонтер баар. Кинилэртэн 200 Арассыыйа регионнарыттан кэллилэр.
Оонньуулар култуурунай бырагыраамаларыгар нэдиэлэттэн ордук кэмҥэ араас култуурунай тэрээһиннэр киирэн ыытылла тураллар. Олортон биирдэстэринэн өрөспүүбүлүкэ талааннаах дьонун, уран тарбахтаахтарын көрдөрөр “Маастардар куораттара” диэн норуот уус уран оҥоһуктарын бэстибээлэ аһыллан үлэлии турар. Бэстибээлгэ киэргэллэртэн саҕалаан, уруһуйга, иискэ тиийэ араас кэрэ оҥоһуктары маастардар көрдөрүүгэ таһаарбыттар. Маны сэргэ туоска, туойга, ситиигэ уонна да атын көрүҥнэргэ маастар-кылаастар ыытыллаллар. Өссө эмиэ атын сирдэргэ курдук, ыалдьыттарга анаан сахалыы таҥастары таҥнан хаартыскаҕа түһүөххэ сөп эбит. Бу барыта ыалдьыттарга бэйэбит култуурабытын чугастык билиһиннэрэр сыаллаах ыытыллар.
“Мин “Азия оҕолоро” спортивнай оонньууларга волонтерабын. Бэйэм Екатеринбург куораттан сылдьабын. Дьокуускайга бэс ыйын 20 күнүгэр көтөн кэлбитим. Наһаа үчүгэйдик көрсүбүттэрэ. Элбэх экскурцияҕа сырыттым, музейдары көрдүм. Барыта олус интэриэһинэй. Дьон манна бары эйэҕэстэр, куруутун үөрэ сылдьаллар, көмөлөһөллөр. Спортивнай оонньууларга волонтерунан кэлэр баҕа санаалаах “добро.ру” сайтка сайаапка биэрбитим. Онтон эрийэннэр кэпсэтии буолбута. Ону ааһан бу кэлэн волонтердуу сылдьабын. Бэйэм бу иннинэ Аан дойдутааҕы футбол чемпионатыгар, “Формула-1” үлэлээбитим. Уопсайынан волонтердаабытым хас да сыл буолла. Дьокуускайга кэлбитим үчүгэй баҕайы, аан бастакытын сылдьабын”, — диэн волонтер Юлия Потехина санаатын үллэстэр.
Кини быыстапканы көрөн сөҕө сылдьарын, саха норуотун таҥаһа олус кыраһыабайын бэлиэтиир. Юлия өссө бэйэтэ маастар кылааска сылдьан баттахха баанары оҥостон кэппит.
“Амма олоҕо” хаһыат