Амма нэһилиэгин «Хардыы» түөлбэтигэр самаан сайыны көрсө субуотунньук бэрт өрө көтөҕүллүүлээхтик ааста.
Оҕолор уонна улахан дьон спортивнай балаһааккабытыгар сайыҥҥы сибэккилэри олортубут, сыыс оту ыраастаатыбыт уонна мастарга уу куттубут. Сибэккилэр буордарын оҕолор биэдэрэнэн таһан көмөлөстүлэр. Сибэккилэрбитин Марфа Алексеевна Харитонова салалтатынан олортубут. Ромашка, бальзамин садовый, петуния мантан сайын улаатаннар, чэлгийэ үүнүөхтэрэ. Водопроводпыт ситимигэр шланга холбоон, хас биирдии маспытыгар ууну дэлэччи куттубут. Андрей Васильевич Андреевка, Егор Егорович Слепцовка, Сергей Федоровка, Ньургун Харитоновка, Владислав Дьячковскайга, водопроводы тардыбыттарыгар өссө төгүлүн махтанабыт. Шланганан ыстаран кутуу үлэбитин быдан чэпчэттэ. Инникитин мастарга уу кутааһыҥҥа иккилии киһи кутара табыгастаах эбит. Насоспутун үлэлэтэргэ уоппутун Семен, Ольга Платоновтартан холбоннубут. Онон кинилэргэ эмиэ махтанабыт. Субботникка кыттыбыт оҕолорбутугар, дьоммутугар Актив аатыттан улахан махталбытын биллэрэбит.Быйылгы сайыммытыгар күөх үүнээйилэрбит өссө улаатан, чэчирии көҕөрдүннэр. Оҕолор, ыччаттар, улахан дьон мустан сынньанар сирдэрэ өрүү ыраас, чэбдик салгыннаах буоллун.
Александра Егорова, «Хардыы» түөлбэ олохтооҕо.