Амматааҕы Н.С. Захаров – Сахаачча аатынан оҕо спортивнай оскуолатын “Олимп” сайыҥҥы лааҕырын иитиллээчилэригэр умнуллубат күн буолан ааста. Лааҕырга Олимпиада кыттыылааҕа, Аан дойду Кубогын хаһаайына, Азия чемпионатын икки төгүллээх үрүҥ көмүс призера, Д. П. Коркин турнирын элбэх төгүллээх чемпиона, Иван Ярыгин түһүлгэтин кыайыылааҕа Виктор Рассадин кэлэн ыалдьыттаата.
“От ыйын 23 күнүгэр биһиги ыҥырыыбытын ылынан сахалар биир киэн туттар бөҕөспүт, биһигини кыраһыабай хапсыһыыларынан үөрдэр Виктор Рассадин кэлэн ыалдьыттаан, лааҕыр оҕолорун уонна үлэһиттэрин кытта көрсөн лааҕырбыт олоҕор биир умнуллубат түгэни бэлэхтээтэ. Виктои оҕолорго олоххо ситиһиини, үүнүүнү-сайдыыны, үтүөнү-кэрэни баҕарабын диэн баҕа санаатын тириэртэ. Бэйэтин туһунан кэпсээн, боппуруостарга эппиэттээтэ. Түмүккэ оҕолор уонна үлэһиттэр Виктортан автограф ылан, бииргэ хаартыскаҕа түһэн, үөрүү-көтүү буоллубут, бастыҥ баҕа санааларбытын чулуу тустуукпутугар тиэртибит”, — диэн Амма улууһун көҥүл тустууга сүрүн тренера Сырдык Айылгын Бойуот уола сырдатта.
“Амма олоҕо” хаһыат