Амма улууһугар ыам ыйын 5 күнүттэн саҕалаан СӨ ЫБМ ведомствалар икки ардыларынааҕы оперативнай бөлөҕө кэлэн үлэлии сылдьар. Бөлөҕү СӨ гражданскай оборонаҕа уонна ыксаллаах быһыыга-майгыга Управлениетын начальнигын солбуйааччы Петр Никонов салайар.
“Биһиги бөлөхпүтүгэр тохсуобут. Ол иһигэр түөрт быыһааччы баар. Манна кэлээт да Амма өрүскэ ыытыллыбыт хараардыы барбыт сирдэрин көрбүппүт. Онно көрдөххө үлэлэр хаачыстыбалаахтык ыытыллан, өрүс эстэргэ бэлэм сытар этэ. Амма өрүс ыам ыйын 5 күнүгэр киэһэ 5 чаастан Алдан оройуонугар Буягаҕа хамсаан барбыта. Онтон Амма улууһун территориятыгар ыам ыйын 6 күнүгэр саҕалаабыта. Ыам ыйын 8 күнүгэр Амма Наахараҕа уонна Амма нэһилиэктэригэр тэҥинэн хамсаан барбыта. Күн бүгүн биэс харыы тахсыан сөптөөх сирдэри ааста, нэһилиэнньэлээх пууннары ылар куттал суох. Онон Амма улууһугар халаан уута этэҥҥэ ааһан иһэр диэн этиэххэ сөп. Кэлэр нэдиэлэҕэ хара уу кэлэр күүтүллэр. Алдаҥҥа хайа хаардара өссө ууллара иликтэр. Онон балайда улахан, критическэй таһымҥа тиийбэтэр да, орто ходуһа уута кэлиэ диэн Гидрометкиин сабаҕалыыр. Биһиги бөлөхпүт манна ыам ыйын 12 күнүгэр диэри үлэлиибит. Өрүс устуутун кыната суох авиация көмөтүнэн кэтээн көрөбүт. Харыы тахсар түгэнигэр ыксаллаах балаһыанньа таҕыстаҕына Дьокуускайтан бөртөлүөтү ыҥыран дэлби тэптэрии үлэтин ыытабыт. Түгэнинэн туһанан Амма улууһун бары олохтоохторун, ытык бэтэрээннэрин Улуу Кыайыы күнүнэн истиҥник эҕэрдэлиибин”, — диэн этэр Петр Петрович.
Кини билигин муус хойуутук, көхтөөхтүк бара турар кэмигэр мууска киирэр булгуччу бобулларын, оҥочолоох дьон муус устан барыар диэри оҥочолорун өрүскэ киллэрбэттэрэ ирдэнэрин, маны ГИМС кыраҕытык кэтиирин эттэ уонна улуус олохтоохторо бука бары сэрэхтээх буолалларыгар ыҥырда.
“Амма олоҕо” хаһыат