Эмис нэһилиэгэр сэтинньи 8 күнэ — бэлиэ күн. Бу күн сырдгы билиини сахпыт оскуолабыт төрүттэммит күнэ. Быйыл бу күн буойун, учуутал, үөрэнэр кыһабыт бастакы дириэктэрэ Илья Николаевич Пестерев төрөөбүтэ 100 сылын кытта дьүөрэлэһэн уратытык ааста.
Оскуолабыт төрүттэммитэ 101 сылын бэлиэтиир күммүтүгэр бастакы дириэктэр Илья Николаевич Пестерев төрөөбүтэ 100 сылынан оҕолоро, сиэннэрэ уонна оскуолабыт бэтэрээн учууталлара кэлэн ыалдьыттаатылар. Тэрээһин саҕаланыытыгар бары сүһүөхпүтүгэр туран оскуолабыт өрөгөй ырыатын ыллаатыбыт. Бу кэнниттэн Илья Николаевич уола, нэһилиэкпитигэр өр сыл баһылыгынан үлэлээбит Илья Пестерев аҕатын туһунан истиҥ иһирэх ахтыыны оҥордо.
«Биһиги аҕабыт Илья Николаевич 1924 сыллаахха Амма оройуонугар Эмис нэһилиэгэр төрөөбүтэ. Аҕата Николай Петрович отоһут этэ, дьону эмтиирэ. Ийэтэ Захарова Пелагея Кузминична аҕабыт 7 саастааҕар, эдэр сааһыгар сылдьан ыалдьан өлбүтэ. Онтон кэлин аҕата убайынаан ыалдьан күн сириттэн бараахтаабыттар. Аҕабыт тулаайах хаалан баран, аймахтарын уонна судаарыстыба көмөтүнэн Аммаҕа үөрэнэн оскуолатын 1940 сыллаахха бүтэрбитэ. 1958 сыллаахха төрөөбүт нэһилиэгэр Эмискэ кэлэн аҕыс кылаастаах оскуоланы, интернаты арыйбыта. Учууталлар олороллоругар 4 кыбартыыралаах дьиэни туттарбыта. Аҕабыт Эмис оскуолата сайдарыгар, көмүс далаһа уурбута оҕону иитиигэ элбэх сыратын биэрбитэ. Биһиги аҕабыт төһө да кытаанах буоллар, бэрт истиҥ иэйиилээх хоһоон суруйара. Араадьыйа истэрэ, кинигэ арааһын ааҕара, мунньара. Хоһун иһэ музей курдук буолара. Аҕам баарына урут улахаҥҥа уурбакка, аахайбакка кинини кытта кэпсэппэтэх эбиппин диэн санааҕа кэллим. Онон оҕолорго этиэм этэ, төрөппүттэргитин таптааҥ, ытыктааҥ болҕомтолоох буолуҥ”, — Илья Ильич бэйэтин диэн санаатын тириэртэ.
Илья Николаевич кыыһа, Полина Ильинична аҕата, бэйэтэ суруйбут хоһооннордоох, ахтыылардаах бэрт суолталаах блокнотун оскуола бибилэтиэкэтигэр бэлэх уунна. Үөрүүлээх тэрээһиҥҥэ Илья Николаевич хоһооннорун 9 -с кылаас уолаттара дорҕоонноохтук аахтылар. Оскуолабыт дириэктэрэ Гаврил Захаров бэлиэ өйдөбүнньүктэри кытта Махтал суругу Илья Ильичка уонна Полина Ильиничнаҕа үөрүүлээх быһыыга- майгыга туттарда. Эһэтин туһунан хирург быраас сиэнэ Дьулус Пестерев эмиэ истиник ахтан ааста. Е.А. Захарова — Саха Күөрэгэйэ аатынан култуура киинин дириэктэрэ Анжелика Иванова бэлиэ күнүнэн эҕэрдэтин тириэрдэн туран дохсун ытыс тыаһын ортотугар оскуолаҕа 110000 солк суумалаах сэртипикээти туттарда.
“Илья Николаевичтыын биһиги сүрдээх элбэх тэрээһиннэргэ, Кыайыы күннэригэр, кырдьаҕастар күннэригэр, бииргэ алтыһан кэлбиппит. Кини сөбүлээн ырыа ыллыыр этэ. Кини аатын умнубаппыт, өрүү ахта-саныы сылдьабыт. Маннык этэн туран, 110000 солкуобай суумалаах сертификаты музыкальнай инструмент ыларгытыгар диэн туттарабын. Ону сэргэ колонка бэлэхтиибит”, — диэн Анжелика Александровна бэйэтин эҕэрдэ тылыгар эттэ.
Бу күн Эмис оскуолата тутуллан үлэҕэ киирэр сылыгар аан бастаан оскуола боруогун атыллаабыттара 50 сыл буолбут выпусктарга кыһыл лиэнтэ кэтэртилэр, оччолорго октябренок буолбуттарын туоһуулуур значогу түөстэригэр ииллилэр. Оскуолабыт оҕолоруттан бастыҥ үөрэнээччи анал ааттары Неустроева Наташа, Яковлев Серёжа, Захарова Айта, Платонов Костя ыллылар. Бастакы кылаас оҕолоругар “Орлята России” хамсааһыҥҥа киирбиттэрин туоһулуур дастабырыанньалары туттардылар.
Түмүккэ хас биирдии кылааһы уонна кэлбит ыалдьыттары минньигэс туордунан күндүлээтилэр.
Эрчим НИКОЛАЕВ, “Кэскил” оҕо бэчээтин эдэр корреспондена