Атырдьах ыйын 29 күнүн туругунан улуус үрдүнэн оттооһун былаана 69,1 бырыһыан туолла. Төһө да кураан буолан от үүммэтэр, отчуттар туох баарынан оттуу сылдьаллар. Оттооһун балаҕан ыйын бүтэһик күннэригэр түмүктэниэ.
Амма улууһун тыатын хаһаайыстыбатын управлениета ылар субуоккатынан атырдьах ыйын 29 күнүн туругунан улуус үрдүнэн 19966 тонна от оттонно. Бу сезоннааҕы былаан 69,1 бырыһыаныгар тэҥнэһэр. Ааспыт сылы кытта тэҥнээн көрдөххө, бу күннэргэ улуус үрдүнэн 26735,5 тонна оттонон былаан 75 бырыһыан туолбута. Онон көрөрбүт курдук быйыл курааннаан балаһыанньа уустук. Ол да буоллар тыа хаһаайыстыбатын управлениета сезоннааҕы былааны 76 бырыһыан, онтон эбии аһылык былаанын эбии толорон сүөһүнү, сылгыны энчирэппэккэ сыл таһаарар соруктаах. Хаһаайыстыбалар эбии аһылыгы бэлэмнээһиҥҥэ киирдилэр.
Ол курдук атырдьах ыйын 29 күнүн туругунан сиилэс былаана 105, 26 бырыһыан, сенаж былаана 65,6 бырыһыан туоллулар. От үлэтэ сүрүннээн түмүктэннэ. Ордук чуолаан чааһынайдар оттоон бүттүлэр. Билигин ходуһаларга тэрээһиннээх уонна сорох улахан бааһынай хаһаайыстыбалар оттуу сылдьаллар. Үлэ күргүөмнээхтик барыаҕын, ардах тохтообокко түһэн атахтаата.
“Амма олоҕо” хаһыат