Улуустааҕы эдэр модельердар уонна муода театрдарын “Сааскы Саһарҕа-2024» күрэхтэрэ бэрт сэргэхтик ааста. Күрэҕи Амма улууһун үөрэҕин салалтата уонна О.П Иванова –Сидоркевич аатынан оҕо айар-сайдар киинэ бэрт сэргэхтик тэрийэн ыыттылар.
Быйылгы “Сааскы Саһарҕа -2024” күрэххэ улуус сэттэ оскуолатыттан 9 коллектив кыттыыны ылла. Ол курдук Е.Е. Пахомов аатынан Болугур орто оскуолатыттан “Дьүкээбил уота” (автор Алиса Кулебякина, салайааччы Э. Д. Николаева) , “Нарын Куо” (салайааччы А. В. Петрова), А.П. Рязанскай аатынан Соморсун орто оскуолатыттан “Уолан” кэлэктиип (салайааччылар М. В. Тараховская, С. А. Саввина), “Ай-Куо” (салайааччылар С.Ю. Борохина, А.Н. Сокольникова), П.И. Караканов аатынан Мээндиги орто оскуолатыттан “Сказочник” театр (салайааччы М. И. Данилова), П.И. Яковлев аатынан Амма Наахара орто оскуолатыттан “Art-tik” муода студията (салайааччы С. Н. Алексеева), В.Г Короленко аатынан Амма 1-гы нүөмэрдээх оскуолаттан 8 “а” кылаас үөрэнээччитэ Ангелина Артемьева, “Кыыс Куо” 8 “б” кылаас үөрэнээччилэрэ (салайааччы Н. Е. Гаврильева), Е.А. Шишигин аатынан Сатаҕай орто оскуолатыттан “Иис Эйгэ” студия (салайааччылар А. Г. Сергеева, В. С. Пахомова, О. Н. Никитина) бэйэлэрин айымньыларын көрдөрдүлэр. Уопсайа 12 номинацияҕа кыттан араас интэриэһинэй, сонун оҥоһуктары, коллекциялары аҕалан, көрөөччүлэри, дьүүллүүр сүбэни сэҥээртилэр, биһирэбиллэрин ыллылар. Күрэххэ кыттааччылар саҥа муодаларын “Коллекция”, “Авангард”, “Бохо стиль”, “Традиция и мода” түһүмэхтэринэн көрдөрдүлэр. “Коллекция” номинацияҕа үс үлэ, “Авангард” номинацияҕа биэс үлэ, “Бохо стиль” икки, “Традиции и мода” номинацияҕа икки үлэ кытыннылар.
Күрэҕи бэрт сэргэхтик Айар сайдыы киин иитиллээчилэрэ Айыына Давыдова, Никита Петров салайан ыыттылар. Бэйэлэрин музыкальнай эҕэрдэлэринэн А.А Черемных аатынан оҕо искусствотын оскуолатын үҥкүү салаатын үөрэнээччилэрэ «Венский вальс» үҥкүүнэн (салайааччы С. А. Дорофеев) киэргэттилэр. Ону сэргэ ылбаҕай ырыаларын Айар сайдыы киин педагогтара Косиор Карманов, Дмитрий Саввинов көрөөччүлэргэ бэлэхтээтилэр. Күрэх дьүүллүүр сүбэтин бэрэссэдээтэлинэн А.А Черемных аатынан Амматааҕы оҕо искусствотын оскуолатын преподавателэ, СӨ култууратын туйгуна Кыыма Жиркова, чилиэннэринэн А.А Черемных аатынан Амматааҕы оҕо искусствотын оскуолатын преподавателэ Туймаада Захарова, Ф.Потапов аатынан Аммтатааҕы норуот айымньытын дьиэтин киэргэтээччи- худуоһунньуга, “Ай-Тик” муода студиятын салайааччыта Александра Кокарева үлэлээтилэр.
Күрэх дьүүллүүр сүбэтин быһаарыытынан «Коллекция» номинацияҕа: I степеннээх лауреат – Амма Наахара оскуола “Art-tik” муода студията, II степенээх лауреат — Сатаҕай оскуола “Иис Эйгэ” студията , III степеннээх лауреат — Мээндиги оскуолата “Модняшки” кэлэктиибэ буоллулар. “Авангард” номинацияҕа: I степеннээх лауреат “Ай-Куо” (Соморсун оскуолата), II степеннээх лауреат “Дьүкээбил уота” (автор Алиса Кулебякина), III степеннээх лауреат “VIII Саха сирин норуоттарын спортивнай оонньууларын символлара” (Сатаҕай оскуолата). Бохо-Стиль” номинацияҕа: I степеннээх лауреат “Үчүгэйиэн” коллекция, (“Ай-Куо”студия Соморсун оскуолата), II степеннээх лауреат “Art-tik” муода студията (Амма – Наахара). «Традиции и мода» номинацияҕа: I степеннээх лауреат — Амма 1№-дээх оскуолатын “Кыыс Куо” 8 “б” кылаас үөрэнээччилэрин бөлөҕө, II степеннээх лауреат – Соморсун оскуолатын “Уолан” бөлөҕө буоллулар.
Улуустааҕы эдэр модельердар уонна муода театрдарын “Сааскы Саһарҕа-2024» “Кылаан бирииһин” аатын В.Г Короленко аатынан Амма 1-гы нүөмэрдээх оскуолатыттан 8 “а” кылаас үөрэнээччитэ Ангелина Артемьева, “Бордуолаах кинээс” олоҥхоттон геройдар авангард танастарын айан таһааран сүктэ, муҥутуур кыайыылаах аатын ылла.
Инникитин күрэхпитигэр өссө элбэх кыттааччыны күүтэбит. Интириэһинэй саҥа көрүүлээх бэйэ айбыт коллекциялары аҕалан дьону үөрдэ, эдэр талааннар сайда үүнэ туруохтара диэн эрэнэбит.
Ньургуйаана КОЛОСОВА, Александра ЕГОРОВА, улуустааҕы эдэр модельердар уонна муода театрдарын “Сааскы Саһарҕа» күрэх тэрийээччилэрэ