Абаҕа нэһилиэгэр элбэх общественнай түмсүү үлэлиириттэн биир саамай көхтөөхтөрүнэн, нэһилиэк олоҕор актыыбынай кыттыылаахтарынан «Үһүс көлүөнэ оскуолата» буолар. Быйыл Абаҕатааҕы филиал үлэтин саҕалаабыта «лоп» курдук 10 сылын туолла.
Оччолорго филиал бастакы салайааччытынан Елена Дмитриевна Старостина биир санаанан талыллыбыта. Елена Дмитриевна ол кэмнэри маннык ахтан-санаан ааһар:
-Абаҕаҕа 2010 сыллаахха “Дьүөгэлэр” түмсүүнү ветераннар Сэбиэттэрин бэрэссэдээтэлинэн үлэлии сылдьан педагогическай үлэ ветерана Емельянова Пелагея Дмитриевна тэрийбитэ. Пелагея Дмитриевна билигин да общественнай үлэттэн тэйбэккэ үлэлии сылдьар, бэйэтин саастаахтарын кытта “Эйэҕэс эбэлэр” диэн түмсүүнү тэрийэн үлэлэтэллэр. Ити сылларга Караканова Ульяна Егоровна тэрийбит “Мир женщин” диэн түмсүүтэ эмиэ үлэлээбитэ. Биһиэхэ холобур буолар дьоммутун «эдьиийдэрбит» диэн ааттыыбыт. Спортзалга кыра хоско мустаммыт бэйэбит сөбүлүүрбүтүнэн дьарыктанар, иистэнэр этибит. Ол курдук, Давыдова Марина Александровна салайыытынан сиэлинэн дэйбиир, олбохтору оҥоро үөрэммиппит. Оччолорго аҕа саастаахтартан Скрябина Софья Петровна, Неустроева Евдокия Николаевна, Кайдалова Августа Еремеевна, Атласова Анна Егоровна, Жиркова Клеопатра Егоровна, эдэрдэртэн Дьячковская Мария Егоровна, Борисова Валентина Георгиевна, Захарова Лариса Егоровна буолан мустаммыт ким тугу сатыырыгар атыттары үөрэтэн дьарыктанар этибит. Евдокия Николаевна оҕуруонан симэх оҥорорго, Лариса Егоровна оҕуруонан киэргэтэн суумка тигэргэ, туоһунан ыаҕайалары оҥорорго үөрэппиттэрэ. Софья Петровна араас оҕуруот аһын, сибэккилэри олордорго, сөптөөхтүк үүннэрэргэ үөрэтэрэ, сүбэ-ама биэрэрэ. Билигин түмсүү иһинэн куруһуоктарынан арахсан дьарыктанабыт. Ол курдук Тритонова Елена Алексеевна салайааччылаах “Түһүлгэ” үҥкүү, Захарова Екатерина Николаевна салайааччылаах “Ыллык” хаалыктаах хаамыы бөлөхтөрө тэриллибиттэрэ, “Имигэс илиилэр” куруһуогу Захарова Лариса Егоровна уонна Гоголева Мария Дмитриевна салайаллар. Сиэлтэн, кылтан, туостан, оҕуруоттан араас оҥоһуктары, киэргэллэри, харысхаллары, иһиттэри оҥоробут, сэлээппэлэри баайабыт, олбохтору тигэбит.
“Үһүс көлүөнэ оскуола” иһинэн тэриллибит “Түһүлгэ” үҥкүү бөлөҕө быйыл 10 сылын бэлиэтиир. Бу бөлөх Абаҕа нэһилиэгин киэн туттуута буолар. Ханнык да тэрээһиннэр “Түһүлгэлэрэ” суох ааспаттар, кэрэ көстүүлээх көстүүмнэринэн, дириҥ ис хоһоонноох үҥкүүлэринэн көрөөччүлэри биһирэтэллэр, долгуталлар. Манна даҕатан эттэххэ, “Түһүлгэлэр” үҥкүүгэ кэтэр таҥастарын, симэхтэрин уран тарбахтаах иистэнньэҥнэр бөлөх кыттыылаахтара Гоголева Мария Дмитриевна, Захарова Лариса Егоровна сүбэлэринэн бэйэлэрэ оҥостоллор.
Елена Дмитриевна “Түһүлгэлэр” 10 сыллаах айар үлэлэрин туһунан киэн тутта кэпсиир:
-“Түһүлгэ” үҥкүү бөлөҕө улуустааҕы, республикатааҕы конкурстарга кыттан дипломант, лауреат буолбуппут, хас да төгүл “Кылаан кыайыылаах” аатын ылан үөрүү өрөгөйүн билбиппит. 10 сыл устата үҥкүүлээн ситиһиибит элбэх. Ол курдук, 2017 сыллаахха муус устарга өрөспүүбүлүкэтээҕи фестивальга “Чаппараах тойуга” үҥкүүнэн кыттан жюри биһирэбилин ылан Турцияҕа барар путевка ылбыппыт, хомойуох иһин, кыайан барбатахпыт. 2019 сыллаахха нэһилиэкпитигэр Сыл бастыҥнарын ааттыыр дьоро киэһэҕэ “Сыл бастыҥ түмсүүтэ” ааты ылбыппыт. Ити сыл муус устарга Санкт-Петербурга 3 күннээх форумҥа республикатааҕы “Үһүс көлүөнэ оскуола” салайааччыта Прядезникова Пелагея Юрьевна, Григорьева Сардаана, Пахомов Артур салайан кыттыны ылан кэлбиппит. Ити форумҥа “Танцуй пока молодой” конкурска “Бронзовый возраст” диэн түһүмэххэ бастааммыт Боруонса кубок ылан кэлбиппит биир улахан ситиһиибит буолар. Кэлэр сылыгар буолар “Серебряный возраст” конкурска кыттар ыҥырыылаах кэлбиппит да, дойдуга ковид ыарыы туран кыайан барбатахпыт.
2023 сыллаахха ыам ыйыгар Болугур нэһилиэгин бочуоттаах олохтооҕо, сцена ветерана Д.Е. Моисеева бирииһигэр “Болугурга үҥкүү киэһэтэ” улуустааҕы үҥкүү күрэҕэр “Кылаан чыпчаал” бирииһи ылан кэлбиппит.
2024 сыллаахха кулун тутар ыйга Чапчылҕан нэһилиэгэр улуустааҕы “Үҥкүү уостубат абылаҥа” күрэххэ кыттан Гран-при хаһаайына буолбуппут.
2024 сыллаахха муус устарга Майаҕа Хара нэһилиэгэр “Сайдар сахам үҥкүүтэ” өрөспүүбүлүкэтээҕи конкурска кыттан Гран-при үрдүк аатын ылбыппыт. Бу курдук аҕыйах холобуру аҕаллым. Бу сыллар тухары Чурапчыга, Уус-Алдаҥҥа, Намҥа, Мэҥэ-Хаҥаласка элбэх конкурстарга кыттан дипломант, лауреат ааттарын ыллыбыт. Ситиһиилэрбитинэн киэн туттабыт уонна салайааччыбытыгар, У.Г.Нохсоров аатынан Духуобунас киинин хореограбыгар Тритонова Елена Алексеевнаҕа, Духуобунас киинин бары үлэһиттэригэр барҕа махталбытын этэбит.
Ити курдук «Түһүлгэлэр» Амма улууһун «Үһүс көлүөнэ оскуола” филиала буолан үлэлииллэр, маастар-кылаастарга кытталлар, ханнык да тэрээһиннэртэн туора турбаттар, 2019 с. Аммаҕа буолбут VII Спортивнай оонньууларга олбохтору тигэн туттарбыппыттара, 2024 с. “Олоҥхо ыһыаҕар” кыбытыктаах тигиинэн оҥоһуллубут олбохтору, суумкалары, нэһилиэкпитигэр кыттыһан эмиэ олбохтору, саламалары оҥорсубуттара. Нэһилиэк олоҕор көхтөөхтүк кыттан, ыытыллар тэрээһиннэргэ, ыһыахтарга, субуотунньуктарга, араас акцияларга барытыгар сүрэхтэрин сылааһын биэрэн туран кытттыыны ылаллар. Үлэлээн бүтэн бочуоттаах сынньалаҥҥа олорор бэйэлэрин саастыылаахтарын общественнай үлэҕэ, көхтөөх олоххо көҕүлээн, ыччакка холобур буолан, сыал-сорук оҥостон үлэлииллэр, айаллар-туталлар. Сэтинньи 23 күнүгэр “Түһүлгэ” үҥкүү бөлөҕүн 10 сыллаах айар үлэтин бэлиэтиир дьоро киэһэҕэ дьоммутун-сэргэбитин ыҥырабыт!
Розалия Гоголева.