Дьокуускай куоракка Суорун Омоллоон аатынан опера уонна балет тыйаатырыгар «Биир ньыгыл Арассыыйа» баартыйа отчуоттуур форума буолан ааста. Форумҥа Амма улууһун дэлэгээссийэтэ киирэн тэриллибит былаһааккаларга кыттыыны ылла. Бөтүҥ нэһилиэгин баһылыга, баартыйа чилиэнэ Саргылана Борисова форумҥа сылдьан «Биир ньыгыл Арассыыйа» Саха сиригэр дьиҥ дьыала баартыйата буоларын өссө төгүл итэҕэйдим диэн этэр.
“Бу форум «Есть результат» диэн партия ыҥырыыта, аҥардас киэн туттар тыл эрэ буолбатын, оҥоһуллубут дьыала туһунан чопчулаан быһааран биэрдэ. Ол курдук өрөспүүбүлүкэбит тыһыынчанан дьоно-сэргэтэ буолар көрсүһүүлэргэ эппит этиилэрэ, нэһилиэк дьаһалталарыгар киллэрбит баҕалара биэс сыл иһигэр чопчу дьыалаларга кубулуйдулар. Ол эбэтэр 52 саҥа оскуола, 30 оҕо сада, 68 ФАП уонна балыыһа амбулаторията, тыһыынчанан килэмиэтир суол, 50 тыһыынчаттан тахса киһиэхэ саҥа дьиэ туттулунна. Ити тутуллубут доруобуйа харыстабылын эбийиэктэриттэн биирдэстэрэ биһиги нэһилиэкпитигэр “Доруобуйа” национальнай бырайыак бастакы звенолары модернизациялааһын бырагырааматынан оллоххо киирэн, билигин хаарбах балыыһаҕа буолбакка, нэһилиэнньэ сырдык, ыраас балыыһаҕа кэлэн көрдөрүнэр, наадалаах өҥөлөрү ылар. Ил Дархан Айсен Николаев этэринэн, партия дьоһуннаахтык дьыалатын дакаастаата – былаас уонна норуот холбоһон, тутаах соруктары толорорго кыахтааҕын көрдөрдө. Иннибитигэр партия 25 сылыгар аналлаах 25 бөдөҥ бырайыагы – спорт, култуура уонна креативнай индустрия эйгэтигэр – бюджеты таһынан атын харчы суотугар толорууга сорук туруорда. Туспа бэлиэтээтэххэ, форум дьон гражданскай эппиэтинэһэ улааппытын көрдөрөр тэрээһин буолла. Аны күһүн балаҕан ыйыгар Судаарыстыбаннай Дума дьокутааттарын быыбарын иннигэр, быһаччы түмүктэри таһаарыы эрэ буолбакка, «Норуот программатын 2.0» салгыырга, дьон саҥа этиилэрин хомуйуу саҕаланна. Анал байыаннай дьайыы кыттыылаахтарыгар уонна кинилэр дьиэ кэргэттэригэр өйөбүлү оҥоруу салҕаныа. Бу барыта өрөспүүбүлүкэ сайдыытыгар уонна дьоҥҥо-сэргэҕэ болҕомтону ууруу сүрүн соруктар буолалларын көрдөрөр”, — диэн Саргылана Васильевна форум кэнниттэн санаатын үллэһиннэ.
“Амма олоҕо” хаһыат