Cоморсун нэһилиэгэр Дойдубут Федеральнай Мунньаҕын тохсус ыҥырыылаах Судаарыстыбаннай Думатын дьокутааттарын быыбарыгар олохтоохтор көхтөөхтүк кытталлар. Балаҕан ыйын 19 күнүнээҕи дааннайынан, күнүс 12 чааска бэҕэһээни кытта холбоон, 235 быыбардааччы куоластаан бэйэтин гражданскай иэһин толорбут.
Соморсуннааҕы 48 нүөмэрдээх быыбардыыр хамыыһыйаны төрдүс сылын Мария Лебедева салайар. Хамыыһыйа үлэтигэр, быыбар хаамыытын тэрийиигэ, хонтуруоллааһыҥҥа Саха Өрөспүүбүлүкэтин общественнай палататын уонна «Сиэрдээх Арассыыйа» партия кэтээн көрөөччүлэрэ үлэлэһэллэр. Общественнай бэрээдэккэ Ис дьыала Амматааҕы отделын сотруднига уонна олохтоох дьаһалта үлэһиттэрэ дьуһуурустубалаан тураллар.
Быыбар маҥнайгы күнүгэр нэһилиэк олохтоохторо көхтөөхтүк кыттыбыттара. Бастакы быыбардааччыбыт нэһилиэкпит элбэх оҕолоох дьиэ кэргэнин күн-күбэй ийэтэ, талба талааннаах Мария Трофимова кэлэн бэйэтин гражданскай быраабын толорбута.
Бастакылар истэригэр бааллар, үлэҕэ, общественнай олоххо куруук инники күөҥҥэ сылдьар ОДьКХ үлэһитэ Николай Емельянов, олохтоох баһаарынай чаас суоппара Михаил Белолюбскай, «Сиэрдээх Арассыыйа» партия общественнай кэтээн көрөөччүтэ Сардаана Борохина, олохтоох дьаһалта үлэһиттэрэ, баһылык Алексей Кононов буоллулар. Маны сэргэ ытык кырдьаҕас ыалларбыт Аграфена, Николай Емельяновтар, Августа Парфенова, Егор Чемезов, Антонина, Николай Степановтар, Мария, Константин Тарабукиннар, Марианна, Данил Ивановтар, Прасковья, Семен Кононовтар сэргэ эдэр ыаллар кэлэн куоластаатылар.
Быыбар иннинэ атын сиргэ олорор биир дойдулаахтарбыт бэйэлэрин бырааптарын туһанан Дойдубут араас муннуктарыгар тиийэ быыбардыырга көхтөөхтүк сайабалыанньаларын биэрдилэр, быыбардыыр кыахтаннылар.
Соморсун дьоно-сэргэтэ түмсүүлээҕинэн, биир санаалааҕынан Дойдубут инники кэскилин быһаарар быыбарга көхтөөхтүк кыттыахтара диэн эрэнэбит.
Надежда БЕЛОЛЮБСКАЯ,
«Соморсун нэһилиэгэ» тыа сирин түөлбэтин баһылыгын солбуйааччы.