Бэҕэһээ, ыам ыйын 7 күнүгэр Кремльгэ Дойдубут Бэрэсидьиэнэ Владимир Путин дуоһунаһыгар официальнайдык киирэр үөрүүлээх тэрээһинэ буолан ааста. Тэрээһин быһа эпииринэн көһүннэ. Онон дойдубут ураты суолталаах тэрээһинин бу баардыы көрө олорор кыахтанныбыт. Амма улууһун уопсастыбаннай Сэбиэтин бэрэссэдээтэлэ, Амма улууһун Бочуоттаах олохтооҕо Степан Бурнашев эмиэ дуоһунаска киирии быһа биэриитин көрөн баран, бу курдук санаатын үллэһиннэ.
“Мин инаугурация хайдах барбытын олус сэргии уонна астына көрдүм. Дойдубут Бэрэсидьиэнэ Владимир Путин андаҕарын уонна ол кэнниттэн эппит тылларын истэн баран, дойдубут куттала суох буолуутугар, кини инники күөҥҥэ сылдьарыгар олох бүк эрэнним уонна Арассыыйа гражданина буоларбынан киэн тутуннум. Бэйэм байыаннай дьыаланы оскуола оҕолоругар сүүрбэччэ сыл устата биэрбит буоламмын, инаугурация кэмигэр Бэрэсидьиэн полкатын көрүүтүн бэркэ сэргээтим. Бэрэсидьиэн полката тэриллибитэ 88 -с сылын туолбутунан эҕэрдэлээтэ. Дьэ хайдах курдук талыллыбыт эдэр дьон хаамалларый! Полк туһунан, манна хайдах талыллан киирэллэрин, туох эбээһинэс сүктэриллэрнин туһунан диктор кэпсиирин астына иһиттим. Полк Бэрэсидьиэн дуоһунаһыгар киириитигэр үгэс быһыытынан кыттар уонна манна бастыҥтан бастыҥнар эрэ киирэллэр. Парады көрө олорон Арассыыйа модун күүһүгэр эрэнним уонна киэн тутуннум ”, — диэн Степан Семенович санаатын үллэһиннэ.
“Амма олоҕо” хаһыат