СӨ култууратын үтүөлээх үлэһитэ, суруналыыс, Амма улууһун, Абаҕа нэһилиэгин бочуоттаах олохтооҕо Прокопий Иосифович Караканов төрөөбүтэ 90 сааһын көрсө былааннаммыт тэрээһиннэр чэрчилэринэн төрөөбүт Мундулаах алааһыгар стенда туруоруллунна.
Биһиги оскуолабыт 2005 сыллаахтан «Амма олоҕо», «Саха сирэ» хаһыат бэтэрээнэ, суруналыыстыкаҕа судаарыстыбаннай бириэмийэ лауреата, Саха Өрөспүүбүлүкэтин култууратын үтүөлээх үлэһитэ, журналист, Амма улууһун, Абаҕа нэһилиэгин бочуоттаах олохтооҕо Прокопий Иосифович Караканов — Бурдук Буокай аатын сүгэр. Прокопий Иосифович 1936 сыллаахха Мээндиги нэһилиэгэр, Мундулаах алааһыгар төрөөбүтэ.
Тэрээһиҥҥэ Мээндигибит аҕа баһылыга Илья Семенов, оскуолабыт дириэктэрэ Иосиф Софронов, Мээндиги нэһилиэгин ытык олохтооҕо, аймаҕа Василий Иннокентьевич Лазарев кыттыыны ыланнар, Прокопий Иосифович олоҕун-дьаһаҕын, үлэтин-хамнаһын туһунан оҕо аймахха тиийимтиэ гына бэрт интириэһинэйдик эттилэр-тыыннылар.
Тэрээһиммитигэр оскуолабытыгар Амма улууһун араас нэһилиэгиттэн кэлбит байыаннай сбор оҕолоро уонна оскуолабыт «Эдэр карбышевтар» байыаннай кулууп иитиллээччилэрэ сырыттылар. Бу тэрээһин кэнчээри кэскилбитигэр өй-санаа өттүнэн сайдалларыгар, төрөөбүт дойдуларын үлэһит дьонун билэллэригэр төһүү күүс буолуо диэн саарбахтаабаппыт.
Прокопий диэн үрдүк аат иккистээн,
Иосифович уобараһын ураннаан,
Олох сырдык остуоруйатын тиһэн,
Айар үлэ кэрэ суолун тутуһан,
Караканов үйэлээх киэҥ аата,
Сүрэхтэрбитигэр өрүү тыыннаах,
Эйиэхэ ананар хоһоон кыната,
Ыччат дьоҥҥо буоллун өйдөбүл.
Харах маҥан кумааҕы сылааһынан,
Олох кырдьыгын сырдаппытын,
Эн үтүө, холку майгыгынан
Норуотун сүрэҕин сылыппытын.
Изабелла ДАВЫДОВА,
оскуола дириэктэрин сүбэһитэ