Сахалыы куттаах ыччаттар “Күөх ыллык” чэбдигирдэр киин сынньанааччыларыгар Амматааҕы А.А. Черемных аатынан оҕо музыкальнай оскуолатын иитиллээччилэрэ кэлэн ыалдьыттаан, сахалыы тойугу иһитиннэрэн үөрдэ-көтүтэн бардылар.
Амматааҕы нэһилиэнньэ социальнай көмүскэлин биир кэлим киинин иһинэн үлэлиир “Күөх ыллык” медицинскэй-социальнай чэбдигирдэр кииҥҥэ “Оллоон” ыччат фольклорнай бөлөҕүн кыттааччылара кэлэн Виктория Григорьева салалтатынан турбут Үстүүн Нохсоороп олоҥхотун “Дыырай Бэргэн” олоҥхону кэлэн сынньанааччыларга бэлэх ууннулар. Манна сахалыы куттаах талааннаах ыччаттар Бөтүҥтэн Надежда Дьяконова, Дыырай Бэргэн, Аан Алахчын Куо, Сындыыс Хара ат, Дарияна Яковлева Айталыын Куо, Амматтан Владимир Дедюкин Тойон Чуучустаан бухатыыр, Ардьамаан — Дьардьамаан, Зинаида Бураева Ап Салбаныкы удаҕан, Аллакаайы Куо удаҕан оруолларын олус бэркэ толордулар. Маны сэргэ Бөтүҥ орто оскуолатын историяҕа учуутала Егор Никифоров уһун сэһэни табыллан сэһэргээтэ. Бырааһынньык өрөбүллэрэ ,,Күөх ыллык,, сынньанааччыларын сахалыы тыыҥҥа, төрүттэрбит бастыҥ айымньыларыгар бэртээхэй айаны, күндү ыалдьыттары бэлэх уунна.
Ирина КОРЯКИНА-ОЛЕСОВА