Амматааҕы үөрэх салалтата үгэс буолбут төрөппүт мунньаҕын тэйиччиттэн олорон ыытта. Бу сырыыга «Аныгы дьиэ кэргэн аныгы оскуола алтыһыылара» диэн тиэмэҕэ кэпсэтии буолла. Мунньахха үөрэх салалтатын начаалынньыгын иитэр үлэҕэ салайааччы Акулина Иванова, төрөппүттэр улуустааҕы түмсүүлэрин бэрэссэдээтэлэ Петр Табунанов, педагогикаҕа уонна психологияҕа методика өрөспүүбүлүкэтээҕи киинин дириэктэрин солбуйааччы Татьяна Алешина уонна Л.В.Киренскэй аатынан Амматааҕы лиссиэй педагог психолога Ольга Чямпина кытыннылар.
Уйулҕаһыттар Татьяна Сергеевна саастара ситэ илик оҕолор оҥорбут ыар уонна олус ыар буруйдарын сэрэтии боппуруостарыгар,ол иһигэр саастара ситэ илик оҕолор наркотиктары сокуоннайа суох эргитиигэ буруйдарын сэрэтэр, саастарын ситэ илик оҕолору көмпүүтэр технологиялары туһанан сокуону кэһэр дьайыыларын бопсор боппуруостарыгар тохтоото. Ольга Ивановна оҕо уйулҕата доруобай буоларын туһугар, төрөппүт оҕо сыһыаннарыгар, оскуола төрөппүт алтыһыыларыгар сырдатыы үлэтин ыытта.
«Сыллата ыытыллар мунньахпытыгар ааспыт үөрэх дьылын сүрүн ситиһиилэрин уонна быйылгы уларыйыыларын билиһиннэрдибит. Быйылгыттан үлэтин саҕалаабыт төрөппүттэр саҥа салайааччылара Петр Валерьевич Табунанов оскуолалар төрөппүттэрин кытта мунньахтаан ылыммыт былаанын билиһиннэрдэ, онон үлэ тэтимнээхтик, эрчимнээхтик саҕаланна диэн үөрэбит уонна эрэнэбит. Төрөппүттэри сырдатар үлэҕэ болҕомто уурабыт — төһө кыалларынан билии-көрүү өттүнэн байалларыгар баҕарабыт. Урут биһиги кэммитигэр оҕо дьиссипилиинэлээх, бэрээдэктээх буоларыгар чиэппэр аайы сыанабыл турарын курдук улууспут өрөспүүбүлүкэтээҕи эспэримиэҥҥэ киирэн эрэр. Оҕо бэрээдэгин ырытар уонна сыаналыыр ирдэбил киирэн эрэрэ сөптөөх диибит. Биллэрин курдук, оҕо бастаан бэрээдэктээх буоллаҕына үөрэҕэр үчүгэйинэн эрэ дьайар, оттон үөрэҕэр үчүгэй буоллаҕына идэтин таба таларыгар, инники олоҕор миэстэтин буларыгар улахан оруоллаах. Оҕо бэйэтин баҕатынан, дьоҕурунан араас тэрээһиннэргэ кыттан сайдарыгар, портфолиотын оҥосторугар төрөппүт уонна кылаас салайааччыта сүрүн күүс буолаллар. Тыа сирин оҕото төрүт дьарыктарбытын утумнуура, үлэҕэ үөрэнэрэ оскуола саастан саҕаланар, онуоха төрөппүт оҕото киһи буолан тахсарыгар бэйэтин холобурунан аныгы үөрүйэхтэри, сатабыллары иҥэрэрэ ордук суолталаах», — диэн санаатын үллэстэр үөрэх салалтатын начаалынньыгын иитэр үлэҕэ салайааччы Акулина Иванова.
Алтана АРТЕМЬЕВА