Саха сирин муниципальнай тэриллиилэрин үбүлүөйдээх Х сийиэстэрэ Дьокуускай куоракка өрөспүүбүлүкэ 445 муниципалитеттарын түмтэ. Нэдиэлэ устата ыытыллыбыт балаһааккаларынан үлэҕэ улуус баһылыга Степан Кузьмин салайааччылаах Амма дэлэгээсийэтэ көхтөөх кыттыыны ылла.
Нэдиэлэ устата, чахчы, олус элбэх көрсүһүүлэр, кэскиллээх кэпсэтиилэр былааннанан ыытылыннылар. Олортон сүрүннэрин туһунан Степан Николаевичтан сырдатарыгар көрдөстүбүт:
— Биир нэдиэлэлээх уһун эрэ буолбакка, бэрт таһаарыылаах үлэлээх сийиэс буолла диэн тута бэлиэтиэм этэ. Хас даҕаны балаһаакканан үлэ барбытыттан биһиэхэ ордук чугаһынан ОДьКХ эйгэтин кыһалҕата буолара саарбаҕа суох. Бу эйгэҕэ уустук балаһыанньа бүрүүкээбитин бары истэ, билэ сылдьабыт. Онтон хайдах тахсабыт, салгыы хайдах үлэлиибит, чааһынай дьону эбии ититии ситимигэр холбооһун , хочуолунайдар өрөмүөннэрэ — тирээн турар кыһалҕа элбэх. Аны Амма улууһун хаачыстыбалаах уотунан хааччыйыы, тыа хаһаайыстыбатын эйгэтигэр киирээри турар механизмнарга бэйэбит көрүүлэрбитин көмүскээһин -маннык стратегическай суолталах хайысхалары таламмыт инники былааммытын оҥосторго Бырабыыталыстыбаны, тустаах министиэристибэлэри кытта ыкса үлэлэстибит.
Итиэннэ Ил Дархан Айсен Николаевы кытта улуустар баһылыктара кыттыылаах көрсүһүүгэ сааскы халаан уутугар, ойуур баһаардарын сезонугар бэлэм буолууну, баар итэҕэстэри, ону туоратар суоллары дириҥ хорутуулаахтык ырытыстыбыт.
Бырабыыталыстыба чилиэннэрэ, Ил Түмэн дьокутааттара кыттыылаах санаа атастаһар балаһааккаҕа сытыытык турар боппуруостарбытын — улууһу гаастааһыны, чуолаан Алтан, Сатаҕай нэһилиэктэргэ үлэ барарыгар үбү-харчыны көрүүнү күүскэ туруорустубут. Санатар эбит буоллахха, бу үлэ Ил Дархан Сорудаҕар киирэн турар. Аны биир саамай тирээн турар сыалбыт-сорукпут — Амма — Аллараа Бэстээх айан суолун аспааллааһын 2029 сылга диэри түмүктэнэрин ситиһии буолар. Үгүс кэпсэтии түмүгэр тустаах министиэристибэлэр бу сыал-сорук туоларыгар ылсан үлэлэһэргэ бэлэмнэрин биллэрдилэр.
Нэһилиэнньэ социальнай өттүнэн көмүскэллээх буолуутун боппуруоһа эмиэ биһиги болҕомтобутуттан сүппэт. Чуолаан тулаайах оҕолорго болҕомто, чэпчэтиинэн туһанар категориялары босхо эминэн хааччыйыы боппуруоһа күүскэ турда. «Сахафармация» акционернай уопсастыбаны кытта кэпсэтэммит улууска босхо эминэн хааччылыы быстыбатын хааччыйары ситиһиэхтээхпит. Тэрилтэ генеральнай дириэктэрин Эдуард Рехлясовы кытта сөбүлэҥ быһыытынан сааскы, күһүҥҥү суол быстарыы кэмигэр эминэн-томунан хааччыллыыга харгыстар аны үөскүө суохтаахтар.
Бу сырыыбыт биир саамай улахан ситиһиитинэн, 3 сыл устата үлэлэспит үлэбит түмүгүн көрдүбүт — ол Амма уонна Чапчылҕан нэһилиэктэрин маастар-былаанын оҥорууга үс өрүттээх Сөбүлэһии түһэрсиллибитэ буолла. Бу — нэһилиэктэр тас көстүүлэрин сайдыытын стратегиятын биир улахан докумуона буолар. Тутуу министиэристибэтин, улуус дьаһалтатын, чуолаан баһылыгы тутуу боппуруостарыгар солбуйааччы Виктор Смирников, архитектор Валентина Олешко биир санаалаах үлэбит түмүгэр инникитин барыахтаах суол-иис оҥоһуутугар, социальнай эбийиэктэр тутууларыгар улахан хамсааһын барарыгар кыах үөскээтэ.
Бу сырыыбыт кэмигэр өссө биир көрсүһүү ыытыллыбытыгар эмиэ болҕомтону хатыам этэ — «Сбербанк» салалтатын кытта көрсөммүт Амма улууһугар кинилэр тэрилтэлэрин хамнаска бырайыактара хайдах үлэлии олорорун билистибит, ханнык чэпчэтиилээх бырагыраамалар баалларын, ол биһиги дьиэ кэргэттэрбитигэр, ипотекаҕа хайдах туох тирэх буолуохтарын сөбүн ырытыстыбыт, итиэннэ хамнас бырайыагын көмөтүнэн улуус бүддьүөтүгэр төһө эбии үп киириэн сөбүн сиһилии кэпсэттибит.
Бу биир нэдиэлэлээх үлэбит кэмигэр нэһилиэнньэни ордук долгутар кыһалҕалары үрдүкү салалта иннигэр туруордубут уонна ол түмүктэрэ инники үлэҕэ улахан көмө, тирэх буолуо, сайдыы, саҥаны олоххо киллэрии өттүгэр көмөлөһүө диэн эрэнэбин.
«Амма олоҕо» хаһыат.