Амма улууһун үс нэһилиэгин оскуолалара идэҕэ туһаайыллыбыт «Умнуллубат онус кылаас» диэн бырайыактарын ааттаан бииргэ түмүстүлэр. Ол курдук Бөтүҥ, Абаҕа уонна Соморсун орто оскуолаларын үөрэнээччилэрэ көрсөн инники идэлэрин кэпсэтэн, доҕордуу сыһыаны олохтоотулар.
Бастаан Соморсун 10-с кылааһын үөрэнээччилэрэ Бөтүҥ орто оскуолатыгар кэлэн билсэн, ирэ-хоро кэпсэтэн, оонньоон-көрүлээн, үҥкүүлээн барбыттара. Онтон иккис көрсүһүү алгыстаах Абаҕа ытык сириттэн, “Саһыл Сыһыы” алааһыттан саҕаланна. Манна Бөтүҥтэн 20, Абаҕаттан 12, Соморсунтан 8, уопсайа 40 оҕо көрүстэ. Сиэри-туому тутуһан киирэр аартыкка алаадьынан айах тутан, сирбитин аһаттыбыт. Историческай суолталаах сиргэ экскурсиялаан, билиибитин хаҥаттыбыт. Өйдүү-саныы сылдьарга уопсай хаартыскаҕа түстүбүт.
Онтон, салгыы сабыс саҥа киирбит Абаҕа оскуола-саадыгар сырыттыбыт. Саҥа оскуола иһэ киэҥэ-куоҥа, сырдыга, ырааһа, сылааһа, кыраһыабай киэргэтиилэрэ тута харахха быраҕыллар. Биһигини география учуутала Сарыал Колодезников көрсөн, оҕолорбутун билиһиннэрдибит уонна география кабинетыгар холбоһуктаах кылаас чааһын ыыттыбыт. Кабинет иһэ аныгы ирдэбилинэн толору хааччыллыылаах: веб-камералаах интерактивнай панель, интернет, компьютер. Бу дуоскаҕа Абаҕа оҕолоро Саха сиринээҕи үөрэх тэрилтэлэрин туһунан олус үчүгэй презентация оҥороннор кэпсээтилэр. Соморсун оҕолоро Санкт Петербург уонна Москва куораттарга баар, уопсайа 20-тэн тахса үөрэх кыһаларыгар сылдьыбыттарын билиһиннэрдилэр. Оттон, бөтүннэр күһүҥҥү сынньалаҥҥа Владивосток куоракка поеһынан баран кэлбиттэрин, онно океанариумҥа, музейдарга, муосталарга, маяктарга, бухталарга уонна араас үөрэх кыһатыгар сылдьыбыттарын кэпсээтилэр.
Оҕолор үгүстэрэ бу айан кэнниттэн ким, ханна туттарса барарын чопчу билэллэр. Соҕуруу куораттарга барааччылар үрдүк үөрэхтэри талан олороллор. Мунаахсыйар оҕолор эмиэ бааллар. Салгыы оскуола устун экскурсия буолла. Оҕолор ордук, уол-кыыс туһунан таҥнар хосторо баалларын астыннылар. Спортзал муостата килэрийэн биир ньуурун сөбүлээтилэр. Остолобуойга баран тото-хана аһаатыбыт, ирэ-хоро кэпсэттибит. Онтон, спортивнай саалаҕа уолаттар хамаандаҕа арахсан волейболга күрэхтэстилэр. Түмүккэ Абаҕа 1-кы,Соморсун 2 уонна Бөтүҥ 3 миэстэҕэ тиксэн, сэмэй бириис ыллылар. Салҕыы доҕордоһуу биэчэрэ тэриллэн үҥкүүлээн, араас оонньуу оонньоон, хаартыскаҕа түһэн, сүрүн сыалбытын-сорукпутун ситиһэн тарҕастыбыт .
Эрдэ ыҥырыыбытын ылынан кэлэн барбыт А.П. Рязанскай аатынан Соморсун орто оскуолатын муусука учууталыгар Марианна Валерьевна Тараховскаяҕа, А.Е.Кралин аатынан Абаҕа орто оскуолатын география учууталыгар Сарыал Анатольевич Колодезниковка этиибитин ылынан сөбүлэспитигэр махтанабыт. Оҕолорбутун сомоҕолуур ырыаҕа ылламмыттыы «Умнуллубат онус кылаас, таптыыр, нарын эдэр саас» үйэ саас тухары өйгө хаалар үтүө түгэннэрэ өссө кэлэ турдуннар!
Василина БОРИСОВА
педагог-библиотекарь, онус кылаас салайааччыта,
Н.Е.Иванов аатынан Бөтүҥ орто оскуолата