А.Д. Макарова аатынан Дьокуускайдааҕы культура уонна искусство колледжын 3-с курсун устудьуона Кирилл Неустроев практикатын Х.Максимов аатынан Сулҕаччытааҕы культура уонна сынньалаҥ киинигэр ааста. Икки ыйы кыайбат кэмҥэ элбэҕи үлэлээн, кэлэктиип да, нэһилиэк да ыччаттарын биһирэбиллэрин ылла.
Кирилл Неустроев төһө да киин сиргэ хаалларан үлэлэтээри гыммыттарыгар сөбүлэспэккэ, төрөөбүт дойдутугар Сулҕаччыга кэлэн айымньылаахтык үлэлээтэ. Үлэлээбит практикатын түмүгүнэн айар үлэтин көрдөрөр “Сахам саҥата” конкурс-викторина ыытта. Бу тэрээһин , эдэр ыччакка, оскуола үөрэнээччилэригэр ананна. Виктооина быыһыгар сахалыы ырыалары иһиттибит, үҥкүүлэри, ыччаттары мунньан туруорбут саха тылын туһунан литературнай композициятын уонна сыаҥкатын көрдүбүт. Күрэх олус сэргэх биэс түһүмэхтэринэн ыытылынна. Ол курдук “Төрүт тыл түһүлгэтэ” түһүмэххэ хамаандалар капитаннарыгар саха литэрэтиирэтин туһунан блиц-турнир буолла. Иккис “Сомоҕо-домох” түһүмэххэ хамаанда чилиэннэрэ бары көмөлөөн толкуйдаан, бэриллибит сомоҕо домох ис хоһоонун бэйэ тылынан судургутук быһаардылар, “Өс хоһооно-үбүгэ номоҕо” түһүмэххэ хамаандалар бэриллибит бириэмэ иһигэр, остуолга кырыллан сытар өс хоһооннорун аҥаарын булан ситэрдилэр, “Таабырынна таайсыаҕын” түһүмэххэ бэриллибит бириэмэҕэ хайа хамаанда элбэх таабырын таба таайарыгар куоталастылар, түмүктүүр “Бэйэҕин уу- сахалыы билиһиннэр” түһүмэххэ хамаанда капитаннара тахсан ыытааччы ыйытыыларыгар биир да нууччалыы киирии тылы кыбыппакка, бэйэлэрин туһунан кэпсээтилэр.
Күрэххэ үс хамаанда кииристэ. Оҕолор олус бэлэмнээхтэрин көрдөрдүлэр. Дьүүллүүр сүбэҕэ СӨ үөрэҕириитин туйгуна Венера Данилова, СӨ култууратын туйгуна Устинья Конникова, РФ уопсай үөрэхтээһинин бочуоттаах үлэһитэ Екатерина Рязанская үлэлээтилэр. Уопсай түмүккэ Мичийэ Бурцева капитаннаах хамаанда бастакы, Мичийэ Александрова капитаннаах хамаанда иккис уонна Сандал Максимов хамаандата үһүс миэстэни ыллылар.
Дьоро киэһэҕэ Сулҕаччы тыа сирин түөлбэтин баһылыгын солбуйааччы Василий Неустроев, Х.Максимов аатынан Сулҕаччытааҕы культура уонна сынньалаҥ киинин дириэктэрэ Жанна Максимова, Кирилл төрөппүттэрэ Елизавета, Герман Неустроевтар кыттыыны ылан эҕэрдэ тылларын тириэртилэр. Манна даҕатан эттэххэ, Кирилл Неустроев соторутааҕыта «Саха» НКИХ ханаалга көстүбүт «Иччитэх дьиэ» сериалга кылаабынай оруолу оонньообута. Биһиги Кирилга өссө да айымньылаах үлэни, бииртэн биир сонун бырайыактары таһаара турарыгар, үөрэҕэр ситиһиилэри баҕарабыт.
Елена ПОПОВА