Амма улууһун баһылыгын э.т. Василий Бураев Дьокуускай куоракка киирэн үлэлээтэ. Олох-дьаһах коммунальнай хаһаайыстыбатын, быыбар түмүктэринэн уонна сир боппуруостарыгар кэккэ көрсүһүүлэр буоллулар.
“Дьокуускай куоракка икки күн устата үлэлээтим. Бу кэмҥэ күн бүгүн улууспутугар тирээн турар суолталаах боппуруостарынан Үп уонна айылҕа харыстыбалын министиэристибэлэригэр, ону сэргэ быыбар түмүктэринэн “Биир ньыгыл Арассыыйа” баартыйа регионнааҕы штабыгар сырыттым. Ол курдук Үп министиэристибэтигэр миниистири солбуйааччы Николай Прокопьевич Старостины кытта көрсөн сүрүннээн олох-дьаһах коммунальнай хаһаайыстыбатыгар турар кыһалҕалары, иэстэри төлөһүү туһунан кэпсэттибит. ону сэргэ 2027 сылга улууспут бюджетин торумнаатыбыт. Көрсүһүүбүт сүрүн боппуруоһунан олохтоох бюджеткэ эбии дотацияны көрүү туһунан буолла. Ол эбии харчы сыл түмүктэниэр диэри баар дефициты сабыыга, бюджеппитин тэҥнээһиҥҥэ барыахтаах диэн санаабын тириэртим.
Биллэн туран билигин балаһыанньа олус уустук эрээри, турар кыһалҕалары быһаарыыга суоллары тобулуохпут диэн биир сүбэҕэ кэллибит. Маны сэргэ айылҕа харыстабылын министиэристибэтигэр Сатаҕай нэһилиэгин баһылыга Алексей Васильевич Шишигины кытта киирэ сырыттыбыт. Онно сүрүн сыалбыт нэһилиэк салгыы сайдарыгар кини территорията уу ылар территорията диэн статустан тахсыыта буолар. Манна биһиги миниистири солбуйааччы Петр Иванович Корякины уонна уу сыһыаннаһыыларыгар Департамент салайааччыта Анисия Егоровна Игнатьеваны кытта көрүстүбүт. Нэһилиэк уу ылар территориятыттан тахсыытыгар өссө төгүл чинчийэн көрүү үлэтэ барыан наадатын, онуоха оробуочай бөлөх тэриллиэхтээх диэн түмүккэ кэллибит. Онон кылгас кэм иһигэр уу ылар сирин кыраныыссатын чуолкайдааһыҥҥа дорожнай карта оҥоһуллуохтаах. Маны таһынан өссө бу оробуочай сырыыга “Биир ньыгыл Арассыыйа ” баартыйа регионнааҕы штабыгар сылдьан, ситэриилээх кэмитиэт салайааччыта Надежда Геннадьевна Селютинаны кытта көрсөн быыбар түмүгүн дьүүллэстибит. Надежда Геннадьевна Амма улууһун олохтоохторугар махтанна уонна инникитин быыбар бырагырааматыгар киирбит соруктары толорууга, баартыйа национальнай бырайыактара улууска киириилэригэр күүскэ бииргэ үлэлэһэргэ сүбэлэстибит. Дьэ ити курдук бэрт таһаарыылаах оробуочай сырыы буолан, улууспутугар турар кэккэ сүрүн боппуруостары быһаарыстыбыт. Кыстыкка киирдибит. Иннибитигэр кыһыны этэҥҥэ тоҥмокко-хаппакка, этэҥҥэ туоруур туһугар бары үлэбитин ыытабыт”, — диэн Василий Иванович командировка түмүгүнэн сырдатта.
“Амма олоҕо” хаһыат