Күн бүгүн киэҥник Саха өрөспүүбүлүкэтин Төрүт Сокуонун 69 ыстатыйатыгар уларытыылары киллэрии дьүүллэһиллэр. Ким эрэ утарар, ким эрэ саамай сөптөөх диир. Амма улууһун дьокутааттарын Сэбиэтин бэрэссэдээтэлэ Владимир Колосов уларытыы киирэрин кытта сөпсөһөр.
“Балаҕан ыйыгар Ил Түмэн дьокутааттара Павел Петров уонна Андрей Николаев Саха өрөспүүбүлүкэтин Төрүт сокуонун 69 ыстатыйатын 3 чааһыгар, ол эбэтэр Ил Дархан боломуочуйатыгар уонна талыллар болдьоҕор уларытыы киллэрэр туһунан этии киллэрбиттэрэ. Маныаха дьокутааттар Ил Дархан икки болдьох субуруччу олорон баран, үһүс болдьоххо киирэр бырааба суох буолара, норуот баҕа санаатын хааччахтыыр диэн этэллэр. Ол мин санаабар сөп. Тоҕо диэтэр үлэлии олорор Ил Дархан өскөтүн үлэтэ үчүгэй, өрөспүүбүлүкэ салгыы сайдар былааныгар ситиһиилээхтик үлэлии сылдьар буоллаҕына, ону норуот өйүүр буоллаҕына, хас баҕарар боллдьоххо олоруон сөп. Бу уларытыы быыбары суох оҥорбот. Син биир өрөспүүбүлүкэни ким салайарын норуот талар. Онон өскөтүн үлэлиир олорор Ил Дархан салгыы үлэлиир баҕалаах буоллаҕына, тоҕо салгыы туруо суоҕай. Кини үлэтин сыаналаан нэһилиэнньэ бэйэтэ быһаарыа. Өссө 2021 сыллаахха Федеральнай Сокуон регионнар баһылыктара салайар болдьохторун регион бэйэтэ быһаарар диэн сокуон ылыммыта. Онон киирэр уларытыы бу Сокуону олоххо киллэриигэ этии буолар. Мин тус бэйэм уларытыы киирэрин сөптөөх дии саныыбын. Өрөспүүбүлүкэ туруктаахтык сайдарыгар икки болдьох диэн кыра. Улахан былааннары олоххо киллэриигэ Ил Дархаммыт хас да болдьоххо үлэлиэн наада. Оччоҕо эрэ туох эрэ түмүктээх, ситиһии баар буолуо. Билэргит курдук Дойду Бэрэсидьиэнэ хас да болдьоххо олорон, уһуннук үлэлээтэ. Онно туох ситиһиллибитэ, Дойдубут инники күөҥҥэ тахсыбыта барыта харахха быраҕыллар. Бу киирэр уларытыылары дьүүллэһии, көрүү Ил Түмэҥҥэ алтынньы ый 21-22 күннэригэр ыытыллар сессияҕа былааннанар”, — диэн этэр Владимир Владимирович.
“Амма олоҕо” хаһыат