Амма улууһун бурдугун хаһаайыстыбалара ыам ыйын 25 күнүн туругунан сиик саптарыытын сүрүннээн түмүктээн ыһыыга киирэн саҕалаатылар.
Амма улууһун кылаабынай агронома Николай Гаврильев бэлиэтээбитинэн, быйыл 3677 гаҕа туорахтаах култуура ыһыллыахтааҕыттан, ыам ыйын 25 күнүн туругунан 420 га ыһыллан былаан 11,2 бырыһыан туолан иһэр. Ордук үчүгэйдик, тэтимнээхтик “Амма” АУо бурдугу үүннэрээччилэрэ үлэлии сылдьаллар. Ол курдук бу хаһаайыстыбаҕа күн бүгүн 1610 га ыһыллыахтааҕыттан 250 га ыһыллан, былаан 15,5 бырыһыан буолла. Ол иһигэр 163 га нэчимиэн, 87 га эбиэс ыһылынна. Кинилэри сэргэ “Болугур” ТХПК 500 гаттан 100 ганы, “Соморсун” ТХПК 300 гаттан 50 ганы, “Абаҕа” ХЭТ 568 гаттан 10 ганы, ИП Фомин А.К. 100 гаттан 10 ганы ыстылар. 500 -тэн тахса га ыһыылаах «Бөтүҥ» хаһаайыстыба сарсыҥҥыттан киирэр былааннаах. Онтон атын бурдук хаһаайыстыбалара билиҥҥитэ ыһыыга толору киирэ иликтэр. улуус баһылыгын планеркатыгар тыа хаһаайыстыбатыну управлениетын салайааччыта Ион Кононов бэлиэтииринэн быйылгы сылга үүт харчыта бириэмэтигэр кэлбэккэ, хаһаайыстыбалар уматык ылыытыгар ыарахаттары көрүстүлэр. Ол да буоллар баар ыарахаттары аахсыбакка, ыһыы үлэтэ тэтимнээхтик барар. Ыам ыйын 25 күнүн туругунан сүөһү аһылыгын култууратын ыһыы былаана улуус үрдүнэн 71,6 бырыһыан туолан турар.
“Амма олоҕо” хаһыат