Эмис нэһилиэгэр биир бэлиэ, умнуллубат күн буолан ааста. Арассыыйаҕа Аҕа дойдуну көмүскээччилэр, Саха сиригэр Ийэ дойдуну көмүскээччи, Амма улууһугар Инфраструктура сайдыытын уонна Улуу Кыайыы 80 сылларыгар эмистэр сүгүрүйэр биир дойдулаахтарыгар, биллэр судаарыстыбаннай деятель, сахалартан биир бастакы учуонай, историческай билим кандидата, уоттаах сэрии сылларыгар норуот үөрэҕириитин миниистирэ, Саха АССР наукаларын үтүөлээх үлэһитэ Василий Назарович Чемезов төрөөбүтэ 110 сылыгар анаммыт тэрээһини үөрүүлээхтик ыыттылар. Бу күн кини бюһа аатын сүгэр түмэлин скверигэр арылынна.
Үөрүүлээх тэрээһиҥҥэ күндү ыалдьыттарынан Василий Назарович чугас дьоно, кыыһа Елизавета Васильевна Чемезова, быраатын уола Юрий Филиппович Чемезов оҕолоро, сиэннэрэ уонна аймахтара буоллулар. Кэлбит ыалдьыттарга, олохтоохторго сцена бэтэрээнэ Софья Соловьева ылбаҕай ырыатын бэлэхтээтэ, нэһилиэк далбардара кымыһынан, алаадьынан күндүлээтилэр.
Эҕэрдэ тылларын улуус баһылыгын бастакы солбуйааччы Василий Бураев, кыыһа Елизавета Чемезова, Амма улууһун бэтэрээннэрин Сэбиэтин бэрэссэдээтэлэ Мария Захарова, Эмис нэһилиэгин баһылыгын солбуйааччытыгар Айталина Кириллина, В.Н. Чемезов аатынан нэһилиэк түмэлин тэрийиигэ үлэлээбит Матрена Владимирова, Амматтан биир дойдулаахтара Матрена Барашкова тириэртилэр. Бэлиэ тэрээһиҥҥэ бюст туруутугар күүс-көмө буолбут дьоннору бэлиэтээтилэр. Ол курдук улуус дьаһалтатын Бочуотунай грамотатынан нэһилиэк олохтооҕо Василий Соловьев, Махтал суругунан Василий Прохоров, нэһилиэк дьаһалтата анаан-минээн оҥорторбут, Василий Чемезов мөссүөннээх үбүлүөйдээх мэтээлинэн кыыһа Елизавета Васильевна, В.Н. Чемезов аатынан түмэл бастакы дириэктэрэ Матрена Владимирова, аймаҕа Гаврил Чемезов, Екатерина Чемезова наҕараадаланнылар.
“Мин бу курдук үөрүүлээх түгэҥҥэ тиийэн кэлбиппинэн олус дьоллоохпун. Аҕам 110 сааһыгар диэри олоруом, кини үбүлүөйдээх сааһыгар ыытыллар тэрээһиҥҥэ кыттыам диэн кырдьыга санаабат этим. Бүгүн кини оруобуна күн сирин көрбүт күнүгэр бюһа арыллыбыта олус долгутуулаах. Бары аҕабын олус истиҥник саныыллар. Онон нэһилиэк дьаһалтатыгар, бу бюст туруутугар бары күүс-көмө, өйөбүл буолбут дьоннорго дириҥ махталбын тириэрдэбин. Аҕам сэрии кэмигэр интернаттары арыйан элбэх оҕо тыыннаах хаалан, үөрэх ылан, үлэһит дьон кини туһунан сылаастык ахталлар, махтаналлар. Аҕам айылҕаттан бэриллибит талааннаах педагог этэ. Бэйэтэ хайдах эрэ тугу да соҥнообокко, ирдээбэккэ биһигини ииппитэ, атын да туора дьону эмиэ. Бары киниэхэ махтаналлар этэ. Кэлэр дьоҥҥо бэйэтин үтүө тылынан, сүбэтинэн куруутун көмө буолара. Элбэх киһи сылдьар буолара. Биһиги дьиэ кэргэн олус иллээх этэ. Биһигини сэргэ бэйэтин бииргэ төрөөбүттэрин оҕолорун ииппитэ. Ол оҕолор оҕолоро билигин кини туһунан наһаа махталлаахтар. Бюст турбута наһаа үчүгэй. Ол гынан баран аҕам хаһан да мэтээллээх сылдьарын көрбөтөҕүм. Кэппэт этэ. Онон бу бюһугар мэтээл баарын соһуйа көрдүм эрээри, бу кини мөссүөнэ турбутуттан махталым улахан”, — диэн Василий Назарович төрөппүт кыыһа Елизавета Васильевна санаатын үллэһиннэ.
Эмис нэһилиэгин баһылыгын солбуйааччы Айталина Кириллина бэлиэтээбитинэн, быйылгы сыл нэһилиэккэ улахан үбүлүөйдээх сыллар. Ол курдук биир дойдулаахтара, норуот ырыаһыта Екатерина Захарова- Саха Күөрэгэйэ төрөөбүтэ 95 сыла уонна сэрии ыарахан сылларыгар оҕо дьиэлэрин, интернаттары тэрийэн үгүс оҕону быыһаабыт үтүөлээх Василий Назарович Чемезов төрөөбүтэ 110 сыла. Кинилэргэ анаан уйгу -быйаҥ ыһыаҕа ыһыллыбыта, испэктээхтэр бэлэмнэннилэр. Сотору кэминэн Василий Назарович олоҕун көрдөрөр хаартысканан кинигэ күн сирин көрүөхтээх, өрөспүүбүлүкэҕэ үөрэх үлэһиттэригэр форум ыытыллара былааннанар. Бу курдук үтүө киһи сырдык аатыгар сүгүрүйэн биир дойдулаахтара нэһилиэк дьаһалтата уонна аймахтара күүстэрин холбоон туруорбут Василий Чемезов ырааҕы толкуйдуу көрөр бюһа оннун булан, кини күн сирин көрбүт күнүгэр, төрөөбүт дойдутугар турда.
“Амма олоҕо” хаһыат