Урбаанньыт Руслан Федотов салайар тэрилтэтэ Амма хочотугар 400 ганы оҥорон, элбэх сыллаах от ыһыытын саҕалаабыта үһүс сылыгар барда. Быйылгы сүөһү аһылыгын бэлэмнээһин хампаанньатыгар тэрилтэ 800-чэкэ туонна оту бэлэмниир былааннаах.
«Бу күннэргэ Амма хочолоругар 270 туонна оту бэлэмнээтибит. Өссө эбии 300 туоннаны оттуохтаахпыт. Манна өр сыллааҕы от, эбиэс уонна күөх маассаҕа барар туорахтаах култуура ыһыллыбыта. Күөх маасса хомуллан сенажтаныахтаах. Арыый хойутуу, бэс ыйын бүтүүтэ ыспыппыт. Ол билигин бэркэ ситэн, сотору хомуллууга бэлэм буолуо. Мантан 200 туоннатын Амма улууһун нэһилиэнньэтигэр атыыга барыа, онтон ордуга хоту улуустарга барар. Бу туһунан өрөспүүбүлүкэ тыатын хаһаайыстыбатын кытта дуогабар оҥоһулла сылдьар. Маны таһынан Лээгигэ үс звено 100-чэкэ туонна оту оттоото. Уопсайа 150 туоннаны бэлэмнээтэхпитинэ сылгыларбытын сыл таһаарар кыахтаахпыт. Быйыл от хаачыстыбата үчүгэй. Ардахтары көрөн кураан күннэри сөп түбэһиннэрэн оттуу сылдьаллар»,- диэн Руслан Еремеевич сырдатта.
Тэрилтэ кэлэр сылтан оҥорбут, бэлэмнээбит Амма өҥ хочолоругар элбэх сыллаах оту ыһан, мелиоративнай үлэлэри ыытан кураан да сылларга өлгөм оту ылар былааннаах. Оччотугар Амма дьоно ыраах сиртэн от атыыласпакка миэстэтиттэн үчүгэй хаачыстыбалаах оту ылар кыахтаныахтара.
«Амма олоҕо» хаһыат