Бүгүн, муус устар 15 күнүгэр, А.Черемных аатынан оҕо искусствотын оскуолатыгар «Чэгиэн туругу, чэбдик олоҕу түстээччилэр» диэн ааттаах Амма улууһугар араас сылларга үлэлээн ааспыт уонна үлэлии сылдьар физкультура учууталларын үлэлэрин-хамнастарын, кэккэ ситиһиилэрин сырдатар ис хоһоонноох дьоһун кинигэни сүрэхтэниитэ буолла.
Бу кинигэҕэ элбэх киһи үлэлэстэ.
Ол эрэн сүрүн автордарынан, үлэтин-хамнаһын түстээччилэринэн, хас да сыл оскуола дириэктэринэн, Амма, Аллайыаха, Аллараа Халыма улуустарын үөрэҕириитин салалтатын начальнигынан, Н.Захаров-Сахаачча аатынан Амматааҕы оҕо спортивнай оскуолатын методиһынан үлэлээбит, Сулҕаччы 8-кылаастаах оскуолатыгар физкультура учууталынан дьоһун олоҕун саҕалаабыт Михаил Прокопьевич Жирков, маны тэҥэ, Амма үөрэҕириитин салалтатыгар, трудовой үөрэхтээһин уонна физическай культура инспекторынан, улуустааҕы үөрэх профсоюһун салайааччытынан өр сылларга таһаарыылаахтык үлэлээбит, тус үлэтин-хамнаһын физкультура учууталынан саҕалаабыт Николай Герасимович Гурьев уонна өр сылларга Сулҕаччы оскуолатын дириэктэринэн үтүө суобастаахтык үлэлээбит, Арассыыйа таһымнаах улахан спортсменнары иитэн таһаарбыт, эмиэ дьоһун үлэһит буолар суолун физкультура учууталыттан саҕалаабыт Алексей Ильич Никифоров буоллулар.
Кинигэ барыта 150 тираһынан «Дани-Алмас» кинигэ кыһатыгар таҕыста. Кинигэ тахсыытын улуустааҕы үөрэх салалтата үбүлээтэ.
Бу дьоро күн Амма улууһун үөрэҕириитин салалтатын начальнига Николай Ларионов, улуустааҕы физическэй култуура уонна спорт салаатын начальнига Дмитрий Наумов, Н.Захаров-Сахаачча аатынан оҕо спортивнай оскуолатын дириэктэрэ Дмитрий Неустроев, улуустааҕы үөрэх профсойууһун бэрэссэдээтэлэ Прокопий Бытыров уонна өр сылларга үлэлэлээбит спорт ветераннара бэйэлэрин эҕэрдэлэрин тиэртилэр.
Спорт, үөрэх сайдыытыгар өссө кэскиллээх
былааннары торумнаан, баҕа санааларын этэн, кэлбит ыалдьыттар үөрэн-көтөн тарҕастылар.
Наталия Рязанская.